گوجو چوخدور ، عاغلي يوخدور
-------------------------------------------------------------------------------
منوچهر عزيزي (هاراي)
-------------------------------------------------------------------------------
آده من اؤلوم قوزو قاييرماقدا اولدو بير ايش؟ هله آتم قاييرماغين بس دئيلدير ، ايندي باشلاميسان قوزودا قايريرسان ؟! آده هئچ اوتانميرسان او ياشدا قوزو قايريرسان ؟! ايشين گوجون قورتاريب ايندي باشلاميسان ميللته قوَزو قايريرسان ؟! آده يئكه كيشي سن ! آداملارين حاق حقوقون اؤده ميشدين ، بيرجه قالميشدي قوزو قاييرماغين ؟

باخ سن اؤله سن قاييرديغين قوزولاري فارسجا دانيشماغا مجبور ائتمه سن ، آراميز ده يه جك ! كوپك اوغلونون قويون قوزولاري بيزدن آرتيقدير كي اونلار اؤز ديللرينده دانيشسينلار ، آنجاق بيزلر فارسجا يازيب اوخوماغا مجبور اولاق ؟ سن اؤله سن اونلار فارسجا دانيشماسالار ، اونلاري شيشه چكيب كاباب ائده‌جه‌ييك‌!

قوزو قايريلان گونون صاباحيسي ، قوزولار پارتياسي ، بير بيان نامه ايله دؤلت واسيطه سيله بير قوزونون قايريلماسينا اعتراض ائده رك ،‌تؤيله دن تؤيله يه يوروش آكسياسي كئچيرمك قرارينا گلميشلر ، بو بيان نامه يه اساساً قوزولارين نئچه ‌باشي يوروش زاماني يونجا يئمكدن امتناع ائده جكلر ! بيان نامه نين قئيدينه اساساً قايريلان قوزولار قوندارما فارس ديلي دانيشماغا معروض قالماق تقديرده ، اونلار دولتله بوتون علاقه لرينه سون قوياجاقلار !

قارا ماللار شوراسي دا ائششك لر اورقاني ايله مشترك بيان نامه ده ، بير قوزونون قايريلماسينا اعتراض ائده رك قئيد ائتميشلر : بئله ياراماز ايشلر بيزيمده باشيميزا گلرسه ، قايرانلارلا بوينوز و سونجوقلا قارشيلاشاجاغيق ! حؤرمتسيزليكله : مال اوغلو مال و ائششك اوغلو ائششك .

كئچي لرين باش باكاني تكه بي جنابلاري دا ، سامان مئيدانيندا سورونو توپلاياراق ، اوزونو قوچلارا توتاراق اونلاري تنقيد آتشينه توتاركن سويله ميشدير : سيز نئجه قوچ سونوز كي سيز اولان يئرده دؤلت قوزو قايرير ؟! آي قوچ اولان يئرده يويوزو يئره سوخوم .... آده ! سيز قوزونون حالالجا آداقليسي اولا اولا حاصارين بوتاييندا ، بير دله دوزون بيري حاصارين اوتاييندا قوزو قاييرسين؟! من سورو باشچيسي اولاراق آغارميش ساققاليما آند ايچيره‌م بيرده دؤلتين تجاوزونه يول وئرسه نيز ، بو ساققاليمي قيرخديرماسام كئچي دئييلم ! دؤلت ائله بيلير كي بيزده آداميق كي باشيميزا هر اويون گتيرسه لر هئچ بير سؤز دئمه يه ك !

بو زامان قوچلارين بيري نين غيرت قاني جوشاركن دئدي : كئچي حضرتلري ! آند اولسون آغ ساققالينا قوزو قايرانا ائله بير كلّه بورجوم اولسون كي ، آدي فردوسونون شاهنامه سينده يازيلسين !!

( آداملار ) : حئيوانلارين غيرتينه فيكر وئردينيز؟1 گؤردونوز بير قوزونون قايريلماسينا نه قيشقيريق سالديلار‌؟ آمما بيزيم باشيميزا قوزودان بتر اويون آچيرلار ، آنجاق كي هئچ جينقيريميزدا چيخمير !! آنجاق بيري بيريميزين قولاغينا پيچيلديريق كي : گوجو چوخدور ، آغلي يوخدور !

منوچهر عزيزي
13/07/85