روسيا و ايرانين منافعي قاراباغي ايشغالدا ساخلاييب
-------------------------------------------------------------------------------
منوچهر عزيزي November 13, 2005
-------------------------------------------------------------------------------

آزربايجانين آيريلماز تركيب حيصّه‌سي ساييلان قاراباغ اون‌آلتي ايلديركي ائرمنستان طرفيندن ايشغال ائديليب و او‌زاماندان بري ميللت لر تشكيلاتي‌نين دؤرد قطعنامه‌سي و مينسك قروپونون هئچ‌بير تشبّوثو اونون آزاد اولماسينا تأثير باغيشلاماييبدير!

حربي واسيطه لرله ايشغال اولموش قاراباغ ، صولح يولو ايله آزاد اولا بيلرمي؟ صولح يولو ايله آزاد اولونان اراضي نه‌يين باهاسينا باشا گله بيلر ؟! سؤز سوزكي موفته باشا گله بيلمز . بس اوندا بو آزادليق هانسي باها ايله عوض اولونا بيلر ؟ قاراباغدان آغير قيمته؟
قاراباغ نييه ايشغال اولدو؟ هانسي دؤلتلرين منافعي اونون ايشغال ائديلمه سينه سبب اولدو‌؟دوغروداندا قاراباغ ائرمنستانين گوجو ايله ايشغال اولدو؟ ايشغالا گؤستريش وئره‌ن دؤلتلرين منافعي ندير؟! قاراباغين صولح يولو ايله آزاد اولماماسي تقديرده ، آزربايجان اوراني حربي يول لا آزاد ائتمه سينه كيفايت قده‌ر گوجه ماليكديرمي؟ و چوخلو سوواللار!……
البته كي قاراباغ ائرمنستانين اؤز گوجو ايله ايشغال اولمادي و آزربايجان بوگون اوراني آزاد ائتمه سينه كيفايت قده‌ر حربي قوّه يه ماليكدير و بو مسئله صولح يولو ايله حلّ اولاسي دئيل . او كي قالدي قاراباغ نييه ايشغال اولدو‌؟ جاوابي اوندان عيبارتدير كي روسيا وايران دؤلتلري نين چوخدانكي سياسي منافعلري ،‌ قاراباغي تجاوزه معروض قوياراق ، اوراني ايشغال آلتيندا ساخلاييبدير !

لاكين بو سووال اورتايا چيخير كي بو ايكي دؤلت اورادا هانسي منافعي گودورلر‌؟ بو اورتادا داشناك پارتياسينين رولو نه‌دن عيبارتدير؟! بو آيدين مسئله دير كي داشناك پارتياسي ، آدي چكيلن دؤلتلرين منافعي گودن و حياتا كئچيره ن دير‌. بو ايكي دؤلتين قاراباغدا نه كيمي منافعي اولماسي سووالينا گلديكده ، دئمك اولار كي بو ايكي دؤلتين منافعي ، آزربايجانين شيمال و جنوب حيصه لره بؤلونمكدن يارانميش ، خالقدا وحدت و بوتؤلنمك تمايولدن و حيسّياتدان تؤره‌ديلدن نيگرانليقدان ايره لي گلميشدير!! باشقا سؤزله دئسك آزربايجانين بيرلشمه سي نه اينكي بو ايكي دؤلتين خيرينه دئيل ، بلكه بو ايكي دؤلتين پارچالانماسينا گتيريب چيخارا بيلر !

بو مسئله يه فاكت اولاراق ، سووئت داغيلديقدان در حال سونرا ، پارچالانميش اؤلكه لر آراسيندا ، لتوني ، ليتواني و استوني اؤلكه لري استثنا اولماق شرطي ايله ، آزربايجان بيرينجي اؤلكه ايدي كي روس امپرياسينا آزربايجاندا سون قويماق اوغروندا 20 يانوارين آغير فاجيعه سيله قارشيلاشدي!! روس اؤز امپرياسيني قوروماق مقصديله قاراباغين ايشغالينا چوخ جيدّي يارديم ائتمكله آزربايجان خالقيندان اؤز آجيغيني چيخدي ، هابئله بو اويونو آبخازدا پروبلم ياراتماقلا ، گورجوستانين دا باشينا گتيردي ! بو كيمي آجيقلار هله دوام ائتمكده دير!

ايران دؤلتينين منافعينه گلديكده مسئله ني داها دا موركّب اولاراق آراشديرمالي ييق !
ايران دؤلتي خصوصيله فارس شوونيزمي آزربايجانين بيرلشمه سيندن سون درجه دهشتده دير !جنوبي آزربايجاندا ، شيمالي آزربايجانين استقلالي ايله پارا لل اولاراق ، ميللي شعورون سون درجه آرتماسي ايله ياناشي ، ايرانين تمامي ايله پارچالانماق حقيقتي دهشت ياراتماقدادير ! جنوبي آزربايجاندا اون ايلدن چوخدور كي بابك مراسيمي نين ميليونلوق كوتله وي قئيد اولونماسي ، و آزربايجانين تاريخينده تايي برابري اولمايان گونش ايلي 85 جي ايلين خرداد آيي نين بيرينده آزربايجانين 50 شهرينده بير ميليوندان چوخ خالقين ميللي اعتراض قالخيشي و حركاتي اينقيلابا برابر اولان بو‌حركاتين نتيجه سينده اونلار آزربايجانلي نين شهيد اولماسي ، بو دهشتي يوز قات آرتيرير .

ايران دؤلتي ائرمنستاندان و دولايي سيلا قاراباغين ايشغال آلتيندا قالماسيندان حمايه ائتمكله ، شيمالي آزربايجاني ضعيف ساخلاماق نيّتي ايله ، آزربايجانين بير لشمه سيله ، ايرانين پارچالانماسينين قارشيسيني آلماق مقصديني گودور! لاكين روسيا و ايران ، اوزون مدّتده نه قده‌ر اؤز سياسي مقصدلرينه دوام وئرمه يه موفق اولا بيلرلر؟! اگر بئله نظره آلساق كي ايكيه پارچالانميش آزربايجان خالقي بيرلشمك قراريندا دئييل لر ، آنجاق ايرانين ديني اقتداري گونئي آزربايجانين اوتوز‌ميليونلوق خالقينا اؤز ميللي و قانوني حقوقونو اؤده مكدن امتناع ائتمه يه دوام وئرمه سي تقديرده آزربايجانين بيرلشمه‌سينه نه روسيا ، نه ائرمنستان ، نه ده ايران اقتداري مانع تؤره ده بيلرلر ، اوزامان ائرمني داشناكلاري ايشغالچي ليغين زهه‌ريني نوش ائده جكلر !

منوچهر عزيزي


03/07/85