هله ليك....
-------------------------------------------------------------------------------
منوچهر عزيزي (هاراي)
-------------------------------------------------------------------------------
هله ليك گئديرم چاغيريلديغيم قانون سوز محكمه يه . بلكه ده گئديره م خالقيما اوزه ريمده اولان آغير بورجومو ابدي اؤده مك ويجدان سئوينجينه دوغرو ؛‌ محكمه نين چاغريشيندان قاييتسام و يا قاييتماسامدا آذربايجان ميللتي نين مقدّس موباريزه سينده ن و دؤتمز ايراده سينده ن يوز فايض آرخاينام . چونكو جاري ايلين خورداد قيامينين ايل دؤنومونده رژيمين پوليس قوه لرينين آغير ضربه لري ، خالقين آغير ايراده سيني داها دا مؤحكمله ده‌ ره ك ، اوغورلو گله جه ييميزه ضمانت ياراتدي.


اؤتن ميللي قيامدان چوخ اهميتلي و قيمتلي نتيجه لر الده ائديلدي ، بيريسي خالقين مؤحكم ميللي بير تشكيلاتين يارانماسي ضرورتين آرتيق گليب چاتماسي كسكين صورتده طلب اولوندو . ايكينجي سي رژيمين اؤز يئرلي رسمي پوليس و امنيت قوّه لرينه دايير گؤزله ديي اعتبارين ايتيريلمه سي آشكار ائديله ره ك ، باشقا ويلايتلرين قوّه لرينه و ارتجاعي موزدورلارا مؤحتاج اولدو . اوچونجوسو اؤزلريني خالقين اؤندرلري كيمي حساب ائدن مدعا چيلارين اكثريندن ويدالاشماغين آرتيق گليب چاتماسي آيدين اولدو .

هله ليك ، يا ابدي گئتسه مده خالقيما سؤز وئريره م خالقيميزين مودافعه سي اوغروندا نه سينام ، نه ده اييلم . من ساتيلماميشام تا ساتقينليق ويجداني عذابي آلتيندا ، خالقيمين منه بخش ائتديگي توكنمز حؤرمت ثروتيني ايتيرمكده ن ناراحات اولام . ياشيمين 70 شي اؤتمك عرفه سينده فخر ائديره م كي هله ده خالقيمين حؤرمتيني ايتيرمه ميشم . من خالقيمين مؤحتشم ليگي برابرينده ، هئچ ذرّه ده دئيلم.

بو خالقي حقيقي معنادا تانييان كيمسه ، اونون اوغروندا جانيني قوربان ائتمكدن چكينمز. من سون قدرتيمه قده ر روحي و جيسمي ايشكنجه لر اؤنونده خالقيمين ايراده سيندن گوج آلاراق سارسيلماياجاغام . اوندان سونرا نه من منم نه ده سؤزلريمين ذرّه قده ر اعتباري وار.

من خورداد آيي نين سگيزينده موغاندا سفرده اولار كن تلفن واسيطه سيله چاغيريلميشام . سون چاغيريلاجاغيم سفرده قاييداندان سونرا قراره آليندي . خالقيمين ميللي حقوقوندان مودافعه ائتمه يه بوللو - بوللو كسكين ايراده لي قانوني سؤزلريم وار . مودافيعه وكيلينه و يا خود موقت آزادليغيما وثيقه ورقه سينه احتياجيم يوخدور . سعي گؤسته ره جه يم محاكمه م سربست و خالقيمين حضوروندا آپاريلسين . رجا ائديره م منيم مودافيعه م و يا داها دوغروسو رژيمي محكوم ائتمه ييم ، دونيا انفرماسيالاردان ياييلسين .

اينانين خالقيم منه بخش ائتديگي آزادليق قانادينين گوجوايله ويجدان محكمه سينين فضاسيندا اوچماقدان سارسيلماياجاغام . من نه قده ر خوشبختم كي خالقيمين قانوني ميللي حقوقدان مودافعه ائتمك فخريني قازانيرام . آخي بئله بير ميللي فخر هله آداما قسمت اولمور . جاوانلارا واجيب بير اونه ريم ، اودا بوندان عبارتدير كي ميللي حقوقلارينيزدان مودافعه ائتمك قانونلاري اؤيره نين . اونلاري تاپيپ اؤيره نمك چتين بير ايش دئييل . من بيرينجي فورصتده دفتر شكلينده اونلاري حاضيرلاياجاغام . سيز قانون سيلاحي ايله ساواشماغي باجارمالي سينيز . قانون سيلاحي ، اودلو سيلاحدان چوخ تأثيرلي دير . قانون ، مدنيت ، موحكم ايراده ، بوتون آزادليق و اجتماعي عدالتيميزه تأمينات يارادابيلر.

هله ليك : منوچهر عزيزي