گونئي آزربايجانين بايراق سورونو ان قيسسا سوره ده چٶزومه قاووشدورولماليدير
--------------------------------------------------------------------------------
حميد دباغي
--------------------------------------------------------------------------------

يوخاريداكي بايراق، گونئي آزربايجاني ايچه ريده، ديشاريدا، سيياسي، ايجتيماعي و عئلمي موناسيبتلرده اولدوقجا ياخچي شكيلده تمثيل ائده جك اويقون بير بايراقدير. بو بايراغين تمل اوچ اٶزه للييي "قوزئي آزربايجان بايراغي ايله عئيني اولماماقلا بيرليكده، اوندان اولابيله جك قده ر آز فرقلي اولماق"، "گونئي آزربايجانين دئوريمچي و اٶنچو سيياسي كيمليييني تمثيل ائتمك" و "توركييه و توركمان ائلي بايراقلارينا ياخينلاشماق"دير.

بايراق ميللتي يارادار، ميللت دٶولتي

اولوسال كيمليك بير توپلومو بير ياندان اٶز ايچينده بيرله شديريره ره ك، باشقا بير ياندان دا اٶته كي توپلوملاردان آييران اٶزه لليكلر و آيريليقلاردير. آشاغيدا سيرالانميش بو اٶزه لليكلر اولوسو يارادان اٶزه لليكلرله عئينيدير:

- اورتاق ديل و اورتاق يازي: تورك ديلي و تورك لاتين يازيسي.
- اورتاق يورد و توپراق: ايراندا تورك خالقي اوچون گونئي آزربايجان، قاشقاي يورد و آفشار يورد.
- اورتاق اردم، گله نه ك و گٶره نه كلر: آشيق كويو (موزييي) و تورك سٶزگٶركو (ادبيياتي)، اولوسال سٶيله نجه و بويلار (اوغوز خاقان، دده قورقود، كوراغلو، اصلي كرم، ...)، خيديرنبي بايرامي، اولوسال پالتارلار (قافقاز پالتارلاري، اويماقلاريميزين پالتارلاري شاهسئوه ن، قاشقاي،...)، قادين- اركك ائشيتلييي،.. ،
- اورتاق سيياسي اٶته ك (تاريخ): باي بك باشقالديريسي، تورك دٶولتلري اٶزه لليكله آزربايجان مركزلي اولان قاراقويونلو، آغ قويونلو، آزربايجان آتابكلري،... آزربايجان مشروطه اينقيلابي، آزاديستان حركتي، ميللي حٶكومت، خالق-ي موسلمان حركتي، هاراي من توركه م باشقالديريسي
- اورتاق دين و اينانج آنلاييشي: تورك جعفريليك فارس ايمامي شيعه لييه قارشيليق، تورك قيزيلباشليق كورد اهل-حقه قارشيليق، سئكولار اولان تورك خالق ايسلامي.
- اورتاق مدني قوروملار:
- اورتاق اٶلچو و بيريملر: توركجه يئدديجه (هفته) گونلري، آيلار، دٶنه نجه لر (فصللر) و اون ايكي ايلخيلي (حئيوانلي) تورك ييمي (تقويمي)...
- اورتاق اولوسال بايراق و آييتيم (سرود).

١- ايراندا تورك خالقينين ياشاديغي بٶلگه لري، مدني و سيياسي آلانلاردا، اٶزه ل تاريخي كيملييه صاحيب بير ائتنيك بيريم اولاراق تمثيل ائده جك بايراقلارا گره ك واردير.

٢- بئله بير بايراغي اوموقلاماق (دسته كله مك) لوزومن فئدئراليست و يا ايستيقلالچي اولماق آنلامينا گلمه ز. ايسته فئدئراليست، ايسته ر ايستيقلالچي، ايسته ر بونلارين هئچ بيرينه اينانمايان، آنجاق تورك خالقي و ياشاديغي بٶلگه لرين اٶزه ل و اٶزگون مدني، ائتنيك و تاريخي كيميلييه صاحيب اولدوغونا اينانان هر كس، بئله بير بايراغي اوموقلامالي و اونو منيمسه مه ليدير.

٣- ميللي بايراغين وارليغي، آيريجا تورك خالقي و بٶلگه لريني اٶز ميللي حاقلاريني الده ائتمه اوغرونداكي اوزون سيياسي ساواشيم سوره جيينده و دٶولتله شمه سيراسيندا تمثيل ائتمك آچيسيندان دا گره كليدير. بو گره كسينيم، سون دٶنه مده اٶلكه ايچي و ديشيندا، بوتون گٶسته ري، يورويوش، توپلانتي، اوتوروم و ائيله ملرده و ان سون گوئني آزربايجانين يو.ائن.پي.او′دا تمثيل ائديلمه سي سوره جينده گٶزلر اٶنونه سريلميشدير.

٤- اٶلكه ايچي و ديشيندا چوخ ساييدا گونئيلي شخص و قورومون، دوغرودان گونئي آزربايجاني تمثيل ائده جك بايراق ياراتما ايشينه قالخيشماسي، بئله بير ائحتيياجين وارليغينين ان آچيق گٶسته رگه سيدير.

٥- دولاييسي ايله اينديكي دورومدا گونئي آزربايجاني تمثيل ائده جك بير بايراغا گره ك اولماديغيني ساوونانلارين (گوناسكام و بير سيرا شخصييتلرين (گونتاي گنج آلپ...) گٶروشلري دوزگون دئييلدير.

بايراق سورونو، دٶولتله شمه سورونو دئييلدير، ميللتله شمه سورونودور

١- گونئي آزربايجانين اولوسال بايراغيني بيلرله مه سورونو، گونئيين موستقيل و يا فئدئرال اولماسينا، يا دا گونئي آزربايجانين اٶز دٶولتيني قوروب اٶز ميللي مجليسي-پارلامئنتيني ياراداندان سونرايا بيراخيلابيلمه ز. چونكو اولوسال و يا ميللي بايراق آديندان دا بللي اولدوغو كيمي ميللت و اولوسلا ايلگيليدير، دٶولتله يوخ.

٢- موستقيل و يا فئدئرال اولما، دٶولت ياراتما و يا مجليس قورما هاميسي ميللتله شمه دن سونرا گله ن دٶولتله شمه آشاماسي ايله ايلگيلي قونولاردير. حالبوكي تورك خالقي و گونئي آزربايجاني تمثيل ائده جك بايراغا قاووشما، اوندان داها اٶنجه كي آشاما يعني ميللتله شمه ايله ايلگيليدير.

٣- بيزيم كيمي دٶولتسيز ميللتلرده، ميللتله شمه دٶولتله شمه نين سونوجو دئييلدير، بلكه ترسي يعني دٶولتله شمه ميللتله شمه ميزين سونوجودور. بو گئرچه يي بئله ده ديلله نديره بيله ريك: بيزيم ميللتيميز و بايراغيميزي دٶولتيميز ياراتماياجاق، دٶولتيميزي ميللتيميز و بايراغيميز ياراداجاقدير. زامان آچيسيندان دٶولتله شمه دن اٶنجه گله ن اولوس و بايراق، قارشيليقلي بيچيمده بير بيري ايله باغلانتيليدير. اولوسلاشمادا ايله رله مه ميز، بايراق ائحتيياجيني دوغورور و بايراغين منيمسه نمه سي اولوسلاشماغيميزي سورعتله نديرير. دولاييسي ايله تورك خالقي و گونئي آزربايجانين اٶز اولوسال بايراغينا قاووشماسي، هم خالقيميزين ميللتله شمه سينه سورعت وئره جك هم ده خالقيميزي دٶولتله شمه يه بير آدديم داها ياخينلاشديراجاقدير.

٤- بيز دٶولتي اولمايان بير ميللتيك. بونون آنلامي، آديندان بللي اولدوغو تكين، دٶولت و اونون قوروملارينا، بو آرادا اولوسال مجليسيميزه صاحيب اولماديغيميزدير. بئله نچي ميللتلر ايسه، يعني دٶولتسيز ميللتلر، ميللي كيمليك و ميللي باغيمسيزليق موجاديله لريني و بو يولدا گره كه ن هر شئيي، او جومله دن بايراق كيمي سمبوللارين سئچيميني وار اولمايان و نه زامان وار اولاجاغي دا بللي اولمايان دٶولتلرينين ياراديلماسينا قوشوللانديرانمازلار.

٥- گونئي آزربايجانين اٶز دٶولت و پارلامئنتيني يارادابيلمه سي، آچيلان گله جه يين، بوگونون يارينين ايشي دئييلدير، بو اولكونون گئرچه كله شديريلمه سي بلكي اونلارجا ايل و قوشاق گره كديره جكدير. بيز دوروموموزدا اولان دٶولتسيز ميللتلر، اٶز سورونلارينين چٶزومونو، نه واخت و نه زامان قاووشاجاقلاري بللي اولمايان اٶز دٶولتلرينين ياراديلماسيندان سونرايا بيراخابيلمه زلر.

٦- دٶولت و مجليس تكجه وار اولان ميللي بايراغي رسميله شديريب اونا قانوني بير ايستاتو وئره ر، آنجاق بايراغين اٶزونو ياراتماز. دونيانين چاغداش سيياسي عورفوندا دا بو بئله دير. يعني مجليسين ياپاجاغي تك ايش، بو و يا باشقا شكيللرله تورك خالقي و گونئيي تمثيل ائده ن و يا ائتمه يه حاق قازانميش بير بايراغي، ياسالارلا قانوني و رسميله شديرمكدير، مجليسين ايشي يئني بير بايراق ياراتماق دئييلدير. بو يول و يٶنته م، توركييه و آزربايجان جومهورييتلري بايراقلارينين رسمي و ياساللاشديريلماسيندا، و نه ياراتيلماسيندا، ايزله نه ن يول اولموشدور.

٧- دونيانين چاغداش سيياسي عورفونده ده بئله بير شئي يوخدور. فيليسطين دٶولتي اولماديغي حالدا، فيليسطيني (خالقي، يوردونو) تمثيل ائده ن بايراق واردير. قونشولوغوموزدا كوردوستان دٶولتي اولماديغي حالدا اينديدن بو خالقي، يوردو و گله جكده قورولماق ايسته نيله ن كوردوستان دٶولتيني تمثيل ائده ن- اوزون سوره دن بري- كوردوستان بايراقلاري واردير.

٨- دولاييسي ايله تورك خالقي و گونئي آزربايجاني تمثيل ائده جك بايراغين سئچيميني، بليرسيز بير گله جكده آزربايجان دٶولتي يارانيب و ميللي مجليس قورولدوقدان سونرايا آتانلارين توتومو (آزربايجان فئدئرال دئموكرات حركتي، ... ) سيياسي آچيدان دوزگون دئييلدير.

اوغورلانان ياتاي آل، آغ، ياشيل شريد و آسلان –گونش- قيليج اوچلوسو

١- ايران بايراغي (اوچ ياتاي آل، آغ، ياشيل شريد و اورتاداكي آسلان –گونش- قيليج سمبولو) كٶكه ن اولاراق تورك خالقي و آزربايجانا عاييددير

٢- آنجاق قاجار تورك-آزربايجان دٶولتي ييخيلاندان سونرا و آردينجا تورك خالقي و آيدينلارينين يوز ايلليك درين بير يوخويا دالديقلاري ييرمينجي يوزايلده اوز وئره ن اولايلار نده ني ايله، بو بايراق گونوموزده هم ايران، هم بٶلگه و هم دونيادا ايرانليليق و فارسليق سمبولونا چئوريلميش و ائله جه تانينميشدير:

بوگونكو سيياسي عورفده ياتاي آل-آغ-ياشيل شريدلر ايرانليليغي (ايران ديلليليك، ايران سويلولوق) تمثيل ائدير. بو اوزدن بو شريدلر عئينن ايران ديللي خالقلارا منسوب اولان تاجيكلر و كوردلر طرفيندن ده اٶز ميللي بايراقلاريندا منيمسه نميشدير.

بوگونكو سيياسي عورفده آسلان، گونه ش و قيليج اوچلوسو، فارس و پرس شاهليغيني تمثيل ائدير. دولاييسي ايله بو آرم، بوتون فارس ميللييتچيلري طرفيندن، باشدا سلطنت طلبلر و مجاهدين اولماق اوزره، اٶز بايراقلاريندا منيمسه نميشدير.

٣- يوخاريدا سٶيله نه نلره داياراق، اٶنه ريله ن و گونئي آزربايجاني تمثيل ائده جك بايراق، ايران دٶولتي بايراغيندان (اوچ آل، آغ، ياشيل شريد؛ آسلان، گونه ش، قيليج اوچلوسو) فرقلي اولماليدير.

٤- دولاييسي ايله آزربايجان دئموكرات فيرقه سي و باشقا بير سيرا شخصييتيميزين (فدائي.....) اٶنه رديكلري بايراقلاردا، آرتيق ايله ري درجه ده ايرانلي-فارسلاشان بو اوچ بويالي شريدلري عئينن منيمسه مه لري، دوزگون بير توتوم دئييلدير.

آزربايجان جومهورييتينين بايراغي، گونئيي تمثيل ائده بيلمه ز

١- گونئي اوچون اٶنه ريله ن بايراق، قوزئي آزربايجان بايراغيندان فرقلي اولماليدير. اساسن اٶلكه ايچي و ديشيندا چوخ ساييدا گونئيلي شخص و قورومون، گونئي آزربايجاني تمثيل ائده جك بايراق ياراتماغا تشببوث ائتمه سي، حتتا بو ايشي گونئي آزربايجان دٶولتينين قورولماسيندان سونرايا حواله ائتمه ري بئله، آزربايجان جومهورييتي بايراغينين گونئييي تمثيل ائتمه ديينه اينانماغين سونوجودور.

٢- پيرينسيب اولاراق قوزئي آزربايجان بايراغي، سيياسي آچيدان قوزئي آزربايجانين اٶزونه خاص اولان ياخين تاريخي، دٶولتله شمه سوره جي و سيياسي كيمليييني تمثيل ائدير. گونئي آزربايجانين اٶزونه خاص و قوزئيدن فرقلي بير ياخين تاريخي، دٶولتله شمه سوره جي و سيياسي كيملييي اولدوغو اوچون، قوزئيده و قوزئيليلر طرفيندن اولوشدورولان آزربايجان جومهورييتينين بايراغي، گونئيين بايراغي اولابيلمه ز.

٣- آزربايجان جومهورييتنين بايراغيني گونئي آزربايجان بايراغي دييه قوللانماق، بير سيرا حوقوقي كيمليك پيرتلاشيقليغا، بو ايكي سيياسي، مدني و تاريخي بيريم و وارليغين سيياست دونياسيندا بير بيرينه قاريشماسينا يول آچار.

٤- گونئيده آپاريلان چتين اولوسال ساواشيمدا، قوزئي بايراغينين گنجلر طرفيندن قالديريلماسي، گونئيده جريان ائتمكده اولان ميللي قورتولوش ساواشيميني هم ايچه ريده و هم دونيادا باشقا بير اٶلكه يه باغلي، باشقا بير دٶولتدن آسيلي اولان بير حركت كيمي گٶسته ره ر، آيريجا بو بايراغي قالديران گنجلره جاسوس ماركي ووردوروب، اونلاري اولدوقجا آغير بير هزينه اٶده مه يه مجبور ائده ر.

٥- قوزئي آزربايجان بايراغينين، بوتٶو آزربايجاني تمثيل ائتمه سي ده تارتيشماغا آچيق بير قونودور. بوتٶو آزربايجان و بايراغي، قوزئي و گونئيين ائشيت بيچيمينده قاتيليمي ايله اورتايا چيخماليدير. اينديدن نه قوزئين بايراغي و نه ده گونئين بايراغي، تك باشينا كسينله شميش بوتٶو آزربايجانين بايراغي دييه سونولماماليدير.

٦- قوزئيليلرين باشدا ائلچي به ي كيمي شخصيتلريميزين منيمسه دييي قوزئيين بايراغي گونئيه داشيناجاقدير دوشونجه سي دوزگون بير دوشونجه دئييلدير. قوزي آزربايجانليلارين آزربايجانين بٶلوندويو و گونئيين سورونلارينين و اونلارين چٶزومونون ده گونئيليلرين سوروملوغوندا اولدوغو گئرچه يينه سايقي گٶسته رمه ليديرلر. دولاييسي ايله آزربايجان جومهورييتي بايراغينين عئينن گونئيين ده بايراغي اولدوغونو تبليغ ائده نلرين (گون آز تي وي، آراس اوغلو، آزربايجان جومهورييتدن چوخ ساييدا شخصين) توتومو دوزگون دئييلدير

گونئي آزربايجان بايراغي- تمل قاوراملار

١- ايراندا تورك خالقينين ياشاديغي و گله جكده موستقيل و يا اٶز ارك (اوتونوم) ايستاتوسو قازانما شانسي اولان هر بير بٶلگه يه بيره ر آيري بايراق گره كليدير. بو دورمودا ايراندا تورك ميللي دئموكراتيك ترپه نيشينه، تورك بٶلگه و تورك دٶولتلريني تمثيل ائده جك دٶرد بايراغا، "گونئي آزربايجان"، "قاشقاي يوردو" (گونئي ايراندا ياشايان آزربايجان توركلري ديياسپوراسينين قوراجاغي دٶولت)، "آفشار يورد" (قوزئي دوغو ايراندا ياشايان خوراسان توركلري ديياسپوراسينين قوراجاغي دٶولت)، و "خلجيستان" (خلج يورد؟) (گونئي آزربايجان دٶولتينه داخيل اولان خلجلرله مسكون و اوتونوم دٶولت) گره كسينيم واردير.

٢- گونئي آزربايجانين موستقيل سيياسي كيملييني تمثيل ائده جك و تكجه اونا اٶزه ل اولان بيرجه بايراغين قبول ائديلمه سي، عاجيل بير ائحتيياجدير و گئجديريله نمه ز. بو آچيدان "ت.د.پ." (تورك دئموكراتيك پيلاتفورمو-١٩٩٦ دا)، "گاموح" (گونئي آزربايجان ميللي اويانيش حركتي)، "گاييپ" (گونئي آزربايجان ايستيقلال پارتيسي) و باشقا قوروم -شخصلرين گونئي آزربايجانا بايراق اٶنه رمه لري اولدوقجا دوزگون و گره كلي بير سيياسي داورانيش اولموشدور.

٣- تورك خالقينا منسوب اولان هر شخص، شخصييت، مدني، ويا سيياسي قوروم و قورولوش، ياشاديغي بٶلگه يه باخيلماقسيزين (گونئي آزربايجان، قاشقاي يورد، آفشار يورد، خلج يورد)، بو بٶلگه لري تمثيل ائده جك بايراقلاري اٶنه رمه حاققينا ماليكدير.

٤- طبيعي اولاراق بايراق اٶنه رمه ده هر بٶلگه اوچون، او بٶلگه ده ياشايان شخص و شخصييتلر و يا او بٶلگه يه باغلي قوروم و قورولوشلارين اٶنجه ليكلري اولماليدير.

٥- ايدئآل اولان ياخلاشيم، هر شخص و قورولوشون اٶنه ريله ن بايراقلار آراسيندان ان چوخ به يه ندييي و اويقون گٶردويو بايراغي اٶز سايت، درگي، تئلئويزييون و باشقا يايينلاردا ايشله تمه سيدير. بئله جه هم خالق بو اٶنه ريله ن بايراقلار و اونلاري ساوونان قوروملارلا تانيش اولار و هم اوزون سوره ده، و زامان ايچينده بير و يا بير نئچه بايراق بونلار آراسيندان اٶنه چيخيب گونئين بايراغي اولما حاققيني قازانار.

ياپيلماماسي گره كه ن يانليشليق

١- اٶنه ريله ن بايراق، اولقون، اويقار (مدني)، چاغداش سيياسي تٶره (اخلاق) و دئموكراتيك آنلاييش ايلكه لرينه (پيرينسيبلرينه) سايقي گٶسته ريله ره ك خالقا سونولماليدير.

٢- بيرئيلر (شخصلر) و قورولوشلار، اٶنه رديكلري و اويقون گٶردوكلري بايراق ويا بايراقلاري، عئينن بو شكيلده يعني "اٶنه رديكلري" و يا "اويقون گٶردوكلري" بايراق و يا بايراقلار اولاراق خالق و دونيايا سونمالي و تانيتماليديرلار. هئچ بير شخص و يا قورولوش اٶنه ردييي، به يه ندييي يا دا اويقون گٶردويو بايراغي، كسينله شميش گونئي آزربايجان بايراغي دييه سونمامالي، تانيتمامالي و بئله نچي بير يانيلقييا گيرمكدن جيددي شكيلده اوزاق دورماليدير.

٣- چاغداش مدني سيياسي اخلاقا ترس اولان بو داورانيش، عئيني زاماندا تورك خالقينا و آزربايجانا ان بٶيوك ايهانتدير و تاريخ اٶنونده محكومدور. بئله داورانيشلاردا بولونان شخصلر و قورولوشلار ايفشا ائديلمه ليديرلر.

٤- دولاييسي ايله آنتي دئموكراتيك و سيياسي اخلاق باخيميندان سون درجه يانليش بير بيچيمده سونولان گاموح′ون اٶنه ردييي بايراق قبول ائديله بيلمه ز. بوتشكيلاتين بو قونوداكي آنلاشيلماز توتومو و يئريتدييي گٶركسوز سيياست، يعني اٶنه ردييي بايراغي گونئي آزربايجانين بايراغي دييه تحميل ائتمه يه قالخيشماسي، بوتونويله يانليش و قبول ائديلمه زدير.

اٶنه ريله ن بايراقلاردا آرانيلماسي گره كه ن اٶزه لليكلر

گئچه ن ايللرده گونئي آزربايجان و تورك خالقينين ياشاديغي اٶته كي بٶلگه لر اوچون بير نئچه بايراق اٶنه ريلمشيدير. اٶنه ريله ن بايراقلاردا ان اويقونونو سئچمكده بير نئچه ايلكه يه ايريم (ديققت) ائديلمه ليدير:

١- گونئي آزربايجان بايراغي، اولابيلديكجه قوزئي آزربايجان و توركييه بايراقلارينا بنزه رليك و اوخشارليغا ماليك و اونلارلا بير بوتونلوك ايچينده اولماليدير. گونئي آزربايجان، قافقاز و آنادولونين كسيشدييي، اٶرتوشدويو بير تورپاق و كيمليكدير. گونئي آزربايجان بير باخيما قافقازين اورتادوغوداكي اوزانتيسي ايسه، باشقا بير باخيمدان دا كيچيك آسيانين اورتادوغوداكي اوزانتيسيدير.

٢- اٶنه ريله ن بايراغين، قوزئي آزربايجان بايراغيندان فرقلي اولماسي گره كدييينه رغمن، گونئي و قوزئي آزربايجان بايراقلاري آراسينداكي فرق اولابيلديكجه آز اولماليدير. بو آچيدان، گاموحون اٶنه ردييي بايراق، آزربايجان جومهورييتي بايراغيندان اساسلي بير بيچيمده فرقلي اولدوغو اوچون، اويقون بير اٶنه ري دئييلدير.

٣- گونئي آزربايجان، قوزئي آزربايجانلا صاحيب اولدوغو باغلار قده ر، توركييه و دوغو آنادولو ايله ده، ديل، سوي، اينانج، سيياسي تاريخ و .... چئشيدلي باغلارا صاحيبدير. گونئي آزربايجان و ايرانين باشقا بٶلگه لرينده ياشايان خالقين سوي كٶكونو اولوشدوران ائل، اويماق و طايفالارين هاميسينا ياخيني توركييه تورپاقلاريندان بورايا كٶچ ائتميش طايفالاردير. آيريجا تاريخي و ائتنيك آزربايجانين و هابئله خالقيميزين اٶنه ملي بير بٶلومو توركييه سينيرلاري ايچينده قالميشدير. دولاييسي ايله گونئين بايراغي، قوزئيله اولدوغو كيمي، توركييه ايله صاحيب اولدوغو بو چوخ يٶنلو و تاريخي باغ و عئينيلييي ده اٶزونده يانسيتماليدير. بو باخيمدان گاموحون اٶنه ردييي بايراق توركييه بايراغي ايله هئچ بير اورتاق يٶنو اولماديغيندان دولايي، اويقون بير اٶنه ري دئييلدير.

٤- اٶنه ريله بايراق ائستئتيك باخيميندان يوكسه ك نئجه ليييه ماليك اولماليدير. ائستئتيك آچيدان دوشوك دوزئيلي و ذٶوقسوز اولان اٶنه ريلر قبول ائديله بيلمه ز.

٥- اٶنه ريله ن بايراقلار هر بٶلگه نين (گونئي آزربايجان، قاشقاي يورد، آفشار يورد، خلج يورد) تاريخي و يا سيياسي كيملييي ايله باغلانتيلي اولوب بو آچيلاردان آنلاملي اولماليدير.

اويقون بير بايراق

بو يازينين باشيندا يئر آلان بايراق، سون دٶنه مده بير نئچه اٶيره نجي طرفيندن اٶنه ريلميشدير. بو بايراق وار اولان اٶنه ريلر آراسيندا ان اويقون بايراق كيمي ده يه رله نديريله بيله ر. بو بايراق اوچ شريدلي، ياشيل-آغ-آل بويالاردان اولوشان و آي-اولدوزلو بير بايراقدير. بو بايراقدا قوزئي آزربايجانداكي سككيز بوجاقلي اولدوز يئرينه، بئش بوجاقلي اولدوز يئر آلير:

١- بو بايراقدا اوچ گٶي، آل و ياشيل شريدلر قوزئي آزربايجان بايراغيندا اولان شريدلرله (هم سيرالاري، هم انلري) عئينيدير. بورادا آل (قيرميزي) توركلوك (اسكي شامان، قيرقيز، اوغوز، قاراخانلي، بايبك، غزنه لي، سلجوقلو، خلج، عوثمانلي، ..... بايراقلاريندا اولدوغو كيمي)، گٶي آوروپا و چاغداشليق (آوروپا بيرلييي بايراغيندا اولدوغو كيمي) و ياشيل ايسلامي گئچميش و تاريخين سمبولودور.

٢- بو بايراق، قوزئي آزربايجان و توركييه بايراقلاريندا اولدوغو كيمي آي-اولدوزلودور. آي اولدوز گٶي تورك سيككه لرينده ده وارايدي.

٣- بو بايراقدا آي هيلالي آزربايجان و توركييه بايراقلارينداكينين عئينيسيدير.

٤- بئش بوجاقلي اولدوز: اولدوزون بئش بوجاقلي اولماسي بير ياندان گونئي آزربايجان و آزربايجان جومهورييتينين اٶزلرينه خاص كيمليكلري اولدوغونو وورقولاديغي حالدا، بو ايكيسينين بايراقلاري آراسينداكي آيريليغي ان آزا انديرير، بير ياندان گونئي آزربايجانلا توركييه نين چوخ يٶنلو باغلاريني وورقولايير. بير ياندان اونو ايسلام دونياسينا باغلايير، عئيني حالدا آزربايجانين سئكولار بير توپلوم اولاراق شيعه-سونني چكيشمه سينه گيرمه يه جه ييني بيلديرير:

الف: گونئي آزربايجانين، قوزئيدن باغيمسيز اولان كيمليييني تمثيل ائدير: بئش بوجاقلي اولدوز گونئي آزربايجان و آزربايجان جومهورييتينين هر بيرينين اٶزونه خاص كيمليكلري اولدوغو گئرچه ييني وورقولايير.

ب: ان اسكي تورك دٶولت سمبوللاريندان بيريدير: بئش بوجاقلي اولدوز ان اسكي زامانلاردان بري تورك سمبوللاريندان بيري اولوبدور. اٶرنه يين گٶك تورك يارماقلاري (سيككه لري) اوزه رينده ده بئش بوجاقلي اولدوزلار بتيمله نيبلر (تصوير ائديليبلر).

ج: گونئي آزربايجانين دئوريمچيليييني تمثيل ائدير: گونئي آزربايجان اينقيلابلار اٶلكه سي؛ اسارتي، كٶله لييي قبول ائتمه يه ن، اونلارا باش قووزايانلارين يوردودور. گئچميش تاريخيميزده باي بك حركتي و ياخين تاريخيميزده ستتارخان، خيياباني، و ميللي حٶكومتين پارلاق اولدوزو آزربايجان، تورك، ايسلام و دوغو دونياسيندا پارلايير. چاغداش دونيادا دا اينقيلاب و عوصيان سمبولو اولاراق تانينميش اولان بئش بوجاقلي اولدوزون گونئي آزربايجان بايراغي اوزره رينده قويولماسي، هم گونئيين اينقيلابچيليغي و چاغداشليغيني بو بايراغا دا داشييير.

د: توركييه و عراق-سورييه ديياسپوراميزلا اولان چوخ يٶنلو باغلاري وورقولايير: بايراقداكي بئش بوجاقلي اولدوز، گونئي آزربايجانين بير چوخ آچيدان، ائتنيك، بوي-اويماقلار، لهجه، اينانج (قيزيلباشليق)، و ..... توركييه ايله اولان اينساني، تاريخي، ديل-لهجه و سيياسي باغلاريني وورقولايير. بئش بوجاقلي اولدوز آيريجا گونئي آزربايجان بايراغيني بئش بوجاقلي اولدوزو اولان عراق و سورييه ده ياشايان توركمان ائلي ديياسپوراميزين بايراقلارينا دا ياخينلاشديرير.

ر- فارس شيعه چيلييينه قارشي بير ايچه رييي واردير: آي و بئش بوجاقلي اولدوز، بوگون دونيادا اٶزه لليكله خيريستييان دونياسيندا ايسلامين و آسلان-گونه ش-قيليج آرمي شيعه لييين سمبولو اولاراق آلقيلانير. شيعه –سونني داعواسي اٶزه لليكله سون ٥٠٠ ايلده هم خالقميزي، هم باشقا تورك خالقلاريني، هم موسلمان دونياسيني بٶلوب پارچالاميشدير. پهلوي رئژيمي بو نييتله بوتون موسلمان دٶولتلرين ترسينه قيزيل آي يئرينه آسلان-گونه ش- قيليجي اٶز سمبولو اولاراق سئچميشدي. اٶته ياندان ايرانين هم پهلوي و هم ايسلامي دٶولتلري تورك خالقي و آزربايجاندا شيعه فاناتيزميني آلوولانيرماقلا، خالقيميزي گئنه ده اسكيده اولدوغو كيمي اويوتماغا، اونو هم تورك دونياسيندان و هم مدني-لاييك دونيادان آييرماق ايسته يير. ايندي بيز، چوخونلوغو شيعه اولان و گئچميشده شيعه-سونني ايختيلافيني كٶروكله يه ن بير خالق كيمي اٶز، بايراغيميزدا ايسلام دونياسينين دا سمبولو قبول ائديله ن بئش بوجاقلي اولدوز و آيي سئچمه كله، دونيايا گونئي آزربايجانين گئچميش آجي يانليشليلاريندان درس آلديغيني، و بير يول داها شيعه-سونني چاتيشما و آيريشماسينا گيرمه يه جه ييني بيلديرير.