ساييلارلا آسيميلاسييون و توركييه لي - شيمالليلارين جنوبا ائله يه بيله جكلري كؤمكلر
-------------------------------------------------------------------------------
داداش قاراقويونلو قيزيلباش- ٢٠٠١
-------------------------------------------------------------------------------
ايراندا پرئزيدئنت سئچكيلرينين اوستانلار بازينداكي نتيجه سي ائعلان ائديلميشدير. بو نتيجه لره داياناراق جنوبي آزربايجانين ايرانين عومومي سيياسي-مدني حياتينا ائنتئگراسييون درجه سيني و بو اؤلكه ده دئموكراتيك له شمه حركتينده كي يئريني ساييلارلا و تقريبي آمما اوبژئكتيو بير شكيلده اؤلچمه يه چاليشاجاغام. من ده يه رله نديرمه ممده سئچكيلره قاتيلماغي قاباجا دينچي-ديكتا-شووئنيست رئژيمين مشروعييتيني قبول ائتمه٫ سئچيملره قاتيلماماغي دينچي-ديكتا-شووئنيست رئژيمين مشروعييتيني قبول ائتمه مه٫ خاتمي`يه وئريله ن رايي رئفورملارا و رئفورميست دينچيلره وئريله ن اوموق (دستك)٫ توكلي`يه راي وئرمه ني ايسه موحافيظه كار دينچيلره وئريلميش اوموق اولاراق آلميشام.

كوردوستان اوستاني نومونه سي:

اؤزومون ده دقيق اولماديغيني البتته بيلديييم بو فرض-تعريف اساسيندا اؤنجه٫ قارشيلاشديرماق اوچون كوردوستان اوستانينداكي نتيجه لره قيسساجا باخاق:



يوروم:

1- كوردوستان اوستاني اؤلكه ده كي سئچكيلره ان آز ايشتيراك ائده ن و دينچي-ديكتا-شووئنيست رئژيمه ان چوخ قارشي چيخان اوستان اولموشدور.

2- كوردوستان اوستاني خاتمي`نين دوغولدوغو يزد اوستانيندان سونرا (٨٩٫١٦% ) بوتون اؤلكه ده اونا ان چوخ سس وئره ن اوستاندير. بو اوستاندا رئژيمين مشروعييتيني قبول ائله ييب سئچكيلره قاتيلانلارين موطلق اكثرييتي دئموكراتيك رئفورملارا اوموق وئرير.

3- رئژيمي قبول ائله يه نلر آراسيندا دا كوردوستان اوستاني موحافيظه كارلارا بلوچيستاندان سونرا (٤٫٩% ) ان آز اوموق وئره ن اوستان اولموشدور.

4- ايران رئژيمي بو اؤلكه ده ياشايان خالقلار طرفيندن ان آز كورد خالقي آراسيندا مشروعييته صاحيبدير. كورد خالقي آراسيندا بو رئژيمي مشروع سايانلارين بئله٫ موطلق اكثرييتي رئفورميستدير.

نتيجه:

كورد خالقي ايرانين عومومي سيياسي-مدني حياتينا ان آز شكيلده ائنتئگره-آسيميله اولموش و دئموكراتيك طلبلر آچيسيندان ان بيلينجلي و ان شوعورلو حركت ائله يه ن خالقيدير.

جنوبي آزربايجانداكي دوروم:

ايندي ايسه جنوبي آزربايجانداكي دورومون نئجه اولدوغونا بير گؤز آتاق. جنوبي آزربايجاندا ايران توركلرينين تقريبن ٧٥% ي ياشايير. بورادا بو سئچكيلرين نتيجه سينه گؤره هوموژئن بير تابلو اورتايا چيخماييبدير. بورادا اوچ بوتونويله فرقلي آلت بؤلگه ني آييرد ائده بيله ريك:



١- جنوبي آزربايجانين بيريمينجي بؤلگه سي: شرقي-غربي-اردبيل

بو اوچ اوستاندا جنوبي آزربايجاندا ياشايان توركلرين تقريبن ٤١٫١% ي (ايران توركلرينين ٣١% ي ) ياشايير.



يوروم:

1- بيريمينچي بؤلگه اوستانلاري اؤلكه ده كي سئچكيلره٫ كوردوستاندان سونرا ان آز ايشتيراك ائده ن و دينچي-ديكتا-شووئنيست رئژيمه ان چوخ قارشي چيخان اوستانلار اولموشدورلار.

2- بو اوچ اوستان بوتون اؤلكه ده خاتمي`يه ان چوخ سس وئره ن اوستانلاردانديرلار. بو اوستانلاردا رئژيمين مشروعييتيني قبول ائله ييب سئچكيلره قاتيلانلارين موطلق اكثرييتي دئموكراتيك رئفورملارا اوموق وئرير.

3- رئژيمي قبول ائله يه نلر آراسيندا دا بيريمينجي بؤلگه اوستانلاري٫ موحافيظه كارلارا ايران اورتالاماسينين چوخ آلتيندا اوموق وئره ن اوستانلاردان اولموشدورلار.

4- ايران رئژيمي اؤلكه ده كي ان آز مشروعييته جنوبي آزربايجانين بو اوچ اوستانيندا صاحيبدير. بوراداكي اينسانلار آراسيندا بو رئژيمي مشروع سايانلارين بئله٫ موطلق اكثرييتي رئفورميستدير.

نتيجه:

جنوبي آزربايجانين بو اوچ اوستانيندا ياشايان توركلر ايرانين عومومي سيياسي-مدني حياتينا آز چوخ ائنتئگره-آسيميله اولموش بونا رغمن دئموكراتيك طلبلر آچيسيندان جنوبي آزربايجانين ان بيلينجلي و ان شوعورلو حركت ائله يه ن خالقيدير.

٢- جنوبي آزربايجانين ايكيمينجي بؤلگه سي: زنجان-همدان-مركزي-تئهران

بو دؤرد اوستاندا جنوبي آزربايجاندا ياشايان توركلرين اكثرييتي٫ يعني تقريبن ٥٣٫٨% ي (ايران توركلرين ٤٠% ي) ياشايير.



يوروم:

أ‌- ايكيمينجي بؤلگه اوستانلاري اؤلكه ده كي سئچكيلره تقريبن ايرانين اورتالاماسي قده ر ايشتيراك ائده ن و دينچي-ديكتا-شووئنيست رئژيمه ايرانين اورتالاماسيندا اولدوغو قده ر قارشي چيخان اوستانلار الموشدورلار.

ب‌- بو دؤرد اوستان دا خاتمييه ان چوخ سس وئره ن اوستانلاردانديرلار. بو اوستانلاردا رئژيمين مشروعييتيني قبول ائله ييب سئچكيلره قاتيلانلارين موطلق اكثرييتي٫ بيريمينجي بؤلگه قده ر اولماسا دا٫ دئموكراتيك رئفورملارا اوموق وئرير.

ت‌- رئژيمي قبول ائله يه نلر آراسيندا دا ايكيمينجي بؤلگه اوستانلاري موحافيظه كارلارا ايران اورتالاماسينين عئينيسي قده ر اوموق وئره ن اوستانلاردان اولموشلار.

ث‌- ايران رئژيمي جنوبي آزربايجانين بو دؤرد اوستانيندا ياشايان اينسانلار طرفيندن ايرانين اورتالاماسي قده ر مشروع ساييلير. بورادا ياشايانلارين آراسيندا بو رئژيمي مشروع سايانلارين موطلق اكثرييتي رئفورميستدير.

نتيجه:

جنوبي آزربايجانين بو دؤرد اوستانيندا ياشايان توركلر ايرانين عومومي سيياسي-مدني حياتينا جيددي و اؤنه ملي اؤلچوده ائنتئگره-آسيميله اولموش٫ آنجاق دئموكراتيك طلبلر باخيميندان جنوبي آزربايجانين بيريمينجي بؤلگه سي قده ر اولماسا دا٫ بيلينجي و شوعرولو حركت ائله يه ن خالقيدير.

٣- جنوبي آزربايجانين اوچومونجو بؤلگه سي: قزوين-قوم

بو ايكي اوستاندا جنوبي آزربايجادا ياشايان توركلرينين تقريبن ٥% ي (ايران توركلرينين ٤% و) ياشايير.



يوروم:

أ‌- اوچومونجو بؤلگه اوستانلاري اؤلكه ده كي سئچكيلره ايرانين اورتالاماسينين اوستونده ايشتيراك ائتميش و دينچي-ديكتا-شووئنيست رئژيمه ايرانين اورتالاماسينين چوخ آلتيندا قارشي چيخان اوستانلار اولموشدورلار.

ب‌- بو ايكي اوستان خاتمي`يه ان آز سس وئره ن اوستانلاردانديرلار. بو اوستانلاردا رئژيمين مشروعييتيني قبول ائله ييب سئچكيلره قاتيلانلار طرفيندن دئموكراتيك رئفورملارا وئريله ن اوموق اؤلكه ده ان ضعيف اولان اوستانلار آراسيندادير.

ت‌- رئژيمي قبول ائله يه نلر آراسيندا موحافيظه كارلارا وئريله ن اوموق ايراندا ان يوكسك سوييه لردن بيريدير.

ث‌- ايران رئژيمي ان چوخ جنوبي آزربايجانين بو ايكي اوستانيندا ياشايان اينسانلار طرفيندن مشروع ساييلير. بورادا ياشايانلار آراسيندا بو رئژيمي مشروع سايانلارين اكثرييتي رئفورميستدير.

نتيجه:

جنوبي آزربايجانين بو ايكي اوستانيندا ياشايان توركلر ايرانين عومومي سيياسي-مدني حياتينا بوتونويله ائنتئگره-آسيميمله اولموش و دئموكراتيك طلبلر آچيسيندان جنوبي آزربايجانين ان آز بيلينجلي و ان آز شوعورلو حركت ائله يه ن خالقيدير.

تكليفلر:

گؤرولدويو كيمي ايرانين مركز و جنوبونا دوغرو گلديكجه٫ جنوبي آزربايجاندا ياشايان اينسانلار آراسيندا ايران رئژيمينين مشروعييتي آرتير٫ دئموكراتيك ايستك و رئفورم طلبلري آزالير. ترسينه مركزدن اوزاقلاشديقجا و آزربايجان و توركييه جومهورييتلري سرحدلرينه ياخينلاشديقجا جنوبي آزربايجاندا ياشايان اينسانلار آراسيندا ايران رئژيمينين مشروعييتي آزالير٫ دئموكراتيك ايسته ك و رئفورم طلبلري آرتير.



بورادان چيخارابيله جه ييميز درسلر واردير:

أ‌- جنوبي آزربايجان اهاليسينين اكثرييتي ايكيمينجي بؤلگه ده (همدان٫ زنجان٫ مركزي٫ تئهران اوستانلاريندا) ياشاديغيني و بوراداكي اينسانلارين اؤنه ملي اؤلچوده آسيميلاسييونا اوغراديقلاريني نظرده آلاراق٫ بورالارداكي ميللي شوعورون اويانماسينا٫ قزئت چاپ ائديلمه سي و س. يه داها چوخ اهمييت وئريلمه ليدير.

ب‌- نه قده ر آزربايجان و توركييه جمهورييتلري ايله اينساني-مدني تماس و قايناشما آرتارسا٫ خالقيميزين آسيميله ائديلمه سي ده او قده ر ياواشلاياييب و چتينله شه جكدير. بو مدني-اينساني تماس و قايناشماني

- آزالدان٫ قاباغيني آلان ويا يوخ ائله يه ن (آزربايجان-توركييه و ايران دؤولتلري آراسينداكي علاقه لري گرگين له شديره ن٫ دوشمنچيليييي تحريك ائتمه و س.)٫
- هئچ بير عملي فايداسي اولمايان ايدديعالار (توركي دونياسييله بيرله شمه شوعارلاري و س.)
- هر هانسي آوانتوريست حركت (سئپاراتيسم٫ شيددت پيروپاقانداسي)٫
- جاهيل شخصلر طرفيندن ايره لي سوروله ن تحريك ائديچي شوعارلار (بؤيوك آذربايجاني ياراتما شوعارلاري و س.)٫
- و بيزه قارشي اولانلارين ساييسيني آرتيران (كورد و فارس خالقلارييلا دوشمنچيليك ياراتماغا تشببوث و س.)

كيمي سيياستلرين سئچيلمه سي-منيمسه نمه سي٫ باشدا چوخ راديكال و خوشا گله ن گؤرونسه لر بئله٫ خالقيميزين وارليغي و دئموكراتيك حركتينه ضربه و خييانتدن باشقا بير شئي دئييلديرلر.

ت‌- آزربايجان و توركييه جومهورييتلرينده كي مدنيله شمه٫ دئموكراتيكله شمه و لاييكله شمه ايرانداكي دئموكراتيك ده ييشيم اوزه رينده عومومن و بو اؤلكه ده ياشايان توركلرين و جنوبي آزربايجانين اوزه رينده خوصوصن سون درجه موثبت٫ درين٫ يئيينله شديريچي و قاليچي تاثيرلر بيراخير و خالقين سمپاتيسيني قازانير.

ث‌- بونا گؤره ده شيمالي آزربايجان و توركييه لي آزربايجان توركلري و قوردوقلاري تشكيلاتلارين جنوبي آزربايجان و ايران توركلري مساله لري حللي اوغروندا ائلييه يه بيله جكلري ان بؤيوك يارديم و تمللي كؤمك٫ اؤز اؤلكه لرينده كي دئموكراتيك له شمه٫ لاييكله شمه و آوروپا حوقوق سيستئمي ايله ائنتئگراسييون حركتلرينه قوشولماق٫ بو رئفورمچو حركتلري يئيينله شديرمك و ايران توركلري كيمي اؤز اؤلكه لرينده كي رئفورملارا و دئموكراتيك له شمه يه (حاكيمييتين سيويلله شمه سي٫ آنا ديللرين آزاد بيراخيلماسي٫ چئشيدلي ديني اينانجلارين آزاد بيراخيلماسي٫ آوروپايلا ائنتئگراسييون و س.) قارشي چيخان موحافيظه كارلاري دئييل٫ رئفورميستلري اوموقلاماق (دسته كلله مك)دير.

داداش قاراقويونلو قيزيلباش