تورك آزربايجان ميللي دئموکراتيک حرکتي
-------------------------------------------------------------------------------
قايناق: اينترنت – داداش.ق.ق
-------------------------------------------------------------------------------
کؤچوره ن : فراهم کاظمي
تبريز بيلي يوردو اؤيره نجيسي
ايصفاهان- دان اولدوزو- سايي ٨

ايرانداکي ائتنيک مساله نين جؤوهري ايران دؤولتينين بو اؤلکه نين چوخ ميللتلي، چوخ ائتنيلي بير اؤلکه اولدوغونو اؤز قانون و حوقوق سيستئمينده قبول و تثبيت ائتمه سيدير. بو قانوني و حوقوقي تثبيتين طبيعي نتيجه سي ايکي شکيلده تجللي ائده جکدير:

ميللي ديللر مساله سي و
سووئره ن((suveren حاکيمييتلر مساله سي.

"ميللي ديللر مساله سي" ندن قصد، عومومي اولاراق بو اؤلکه ده کي ميللي ديللرين هاميسينين و ايستيثناسيز٫ "رسمي ديل" ايستاتوسو قازانمالاري (مئدييا، تحصيل و ايداري سيستئملرده) و خوصوصي اولاراق تورك ديلينين ايرانين ايکينجي "دؤولت ديلي" اولونماسيدير. بو دئموکراتيک ايسته کلر بوتون پلاتفورملاردا، ايرانين ايچينده ده، آچيقجا و ايصرارلي شکيلده ديله گتيريلمه لي و ياييلماليدير.

"سووئره ن حاکيمييتلر مساله سي" ندن قصد، عومومي معنادا بو اؤلکه ده کومپاکت حالدا ياشايان بوتون ميللت- خالق – ائتنيک قوروبلارين٫ خوصوصي معنادا دا توركلرين کومپاکت شکيلده ياشاديقلاري بؤلگه لرده -شراييطه گؤره- اوتونوم، فئدئرال، کونفئدئرال فورملارين بيرينده اؤز سووئره ن حاکيمييتلريني قورمالاريدير.

ايراندا توركلر اؤلکه نين هر طرفينه داغيلسالار دا، بونلار اساس اولاراق اوچ کومپاکت بؤلگه ده ياشاييرلار: جنوبي (ائتنيك) آزربايجان، ايرانين گونئيينده قاشقاييستان (قاشقاي ائلي) و خوراسانين شيماليندا افشار ائكسكيلاوي (افشار ائلي) ندا. دئمک آذري مساله سي دييه نده (سووئره ن دؤولتله علاقه لي) بو اوچ آلت مساله دن يعني ائتنيك (جنوبي) آزربايجان٫ قاشقاييستان (قاشقاي ائلي) و خوراسانين شيمالينداكي افشار ائكسكيلاويندان (افشار ائلي) سؤز گئدير.

ائتنيک (جنوبي) آزربايجان و قاشقاييستاندا (قاشقاي ائلي) ياشايان تورك قوروبلار عئيني ديل يعني توركجه نين عئيني لهجه سينده يعني آزربايجانجادا (فرقلي آغيز، شيوه لرينده) دانيشديقلاري حالدا خوراساندا افشار ائکسکيلاويندا (افشار ائلي) ياشايان توركلر عئيني ديلين يعني توركجه نين بير آز فرقلي اولان آيري بير لهجه سينده يعني خوراسانجادا دانيشيرلار. بو اوچ تورك بؤلگه سينده کي اينانان آذريلرين هاميسي اساسن شيعه و علوي مذهبلرينه اينانيرلار.

تورك ميللتله شمه حرکتي "ديل بيرلييي" اساسيندا اولماليدير. آمما بورادا تاکيد ائديلمه ليدير کي بو ديل بيرليييندن قصد، "ايندي وار اولان ديل بيرلييي" يعني جنوبي آزربايجان، گونئي ايراندا قاشقاييستاندا و خوراسانداکي افشار ائکسکيلاويندا ياشايان توركلرين ديلي کيمي و نه گله جکده ياراديلاجاق اولان ديل بيرليييدير.

معلومدور کي ايراندا توركلردن باشقا اوچ تورکي ميللت – خالق – قوروپ داها ياشايير: تورکمنلر، خلجلر، قازاقلار (و بير سيرا قايناقلارا گؤره آز ساييدا اويغورلار). بونلاردان ايرانين شيمال شرقينده ائتنيک تورکمنيستاندا ياشايان تورکمنلرين و جنوبي آزربايجانين جنوبي منطقه سينده يئرله شميش خلجيستاندا ياشايان خلجلرين اؤز کومپاکت بؤلگه لري واردير.

قازاقلار ايسه ائتنيک تورکمنيستاندا ياشايير و کومپاکت بؤلگه يه صاحيب دئييلديرلر. تورکمن ديلي توركجه کيمي، تورکي ديللرينين اوغوز قوروبونا داخيل اولسا دا بيزيم ديلين بير لهجه سي، شيوه سي و يا آغيزي ساييلماز. خلج ديلي ايسه تک باشينا تورکي ديللرينين موستقيل بير شاخه سيني تشکيل وئرير. بو ايکي قوروبلا بيزيم ديل بيرليييميز يوخدور. اساسن بو ايکي خالق بيره ر آيري خالق اولدوقلاري اوچون بيزيم اونلارلا بيرله شمه ميز (ديل بيرلييي) ياراتماغيميز مومکون دئييلدير.

بيزيم تورکمن و خلجلرله اولان موناسيبتيميز، اونلارين دا٫ ايرانداکي ديگر بوتون خالقلار کيمي٫ ديللرينين رسمي له شمه سيني و کومپاکت اولاراق ياشاديقلاري بؤلگه لرده اؤز ميللي حاکيمييتلريني قورما ايسته کلريني مودافيعه ائتمکدن عيبارتدير. دوروم ييغجام شكيلده خولاصه له نيرسه٫ بئله ليکله:

تورك ميللي دئموکراتيک حرکتي، توركجه نين ايرانين ايکينجي "دؤولت ديلي" اولماسيني طلب ائدير. ايراندا دانيشيلان بوتون ديللرين (و بو آرادا تورکمنجه و خلججه نين ده) ايستيثناسيز رسمي ديل ايستاتوسو الده ائتمه لريني (مئدييا، تحصيل، ايداري سيستئملرده) دستکله يير.

تورك ميللي دئموکراتيک حرکتي، توركلرين کومپاکت اولاراق ياشـاديقلاري بؤلـگـه لرده، يعني ائتنيك (جنوبي) آزربايجان٫ قاشقاي ائكسكيلاوي (قاشقاييستان=قاشقاي ائلي) و خوراساندا افشار ائكسكيلاوي (افشار ائلي) اوچون٫ اؤز ميللي حاکيمييتلريني قورما حاققيني (شراييطه گؤره اوتونوم، فئدئره، کونفئدئره) طلب ائدير. ايراندا ياشايان و کومپاکت بؤلگه يه صاحيب اولان ديگر ميللت – خالقلارين دا (بو آرادا خلج و تورکمنلرين) هاميسينين ايستـيثناسيز بو حاقدان فايدالانمالاريني دستکله يير. و خلجيستانين گله جک فئدئرال آزربايجان ترکيبينده قالماسيني اويغون گؤرور (اصيل قرار صاحيبي خلج خالقيدير).