اولوسلارآراسی ویجدان اویاقمی؟
-------------------------------------------------------------------------------
صدیقه عدالتی - آلمان
-------------------------------------------------------------------------------
بیر سوره اؤنجه آلمانین شهه رلرینین بیرینده، آوروپالیلار طرفیندن دوزه نله نه ن، تورک دیلی و باتیلیلارین بو دیله گؤسته ردیيی ایلگی‌نین گئتدیکجه آرتدیغی تارتیشیلان بیر سئمیناردایدیم. البتته کی دیلیمیزین زنگینلیيینی و دونیادا گئده ره ک آرتدیغی اؤنه مینی گؤرمک و یاخیندان دا بونا شاهید اولماق چوخ گؤزه ل بیر دویقودور. گؤزه ل دویقولار ایچه ریسینده ایکن آجی بیر خبرین خبرچیسی اولان بیر یازی آلدیم؛

دیلماجی دا قاپاتدیلار!

اینسان گؤزو و بئینی قاریشیق اورقانلارلار؛ گؤز باخار، آمما بعضی اولومسوزلوقلاری گؤرمک ایسته مه ز، بئیین آلقیلار، آمما حاقسیزلیغی گؤرونجه ده اولایی آنلاماق ایسته مه ز. یازینی بیر نئچه دفعه اوخودوم، آخی بو مساله‌یه اینانماق دا عاقیل دیشی بیر شئیدی.

بئله بیر دورومدایدیم.

بیر طرفدن مینلرجه کیلومئتره آنا وطندن اوزاق، یابانجیلارین بیزیم آنا دیلیمیزه گؤسته ردیيی ایلگینی گؤروب ده سئوینجدن اوچارکن، او بیر طرفده اؤز تورپاغیندا دیلینه قیفیل وورولموش، آنا دیلینی اؤیره نمکدن یوخسون بيراخیلمیش خالقیمین تک دیلماجی دا سوسدورولور. نییه؟

دیلماجین سوچو نئیدی؟

بو سورویا جاواب بولماق ایچین بللی بیر سوره داها بکله دیم، بلکی دیلماجی یایینا قاپاتانلار گؤردوکلری اینسانلیق دیشی حرکت اوچون بیر دلیل گؤسته ریرلر، آمما بوگونه قده ر اونلاردان هیچ بیر گره کچه گؤسته ریلمه ییپ. دیلماجین سوروملولارینین یازدیقلاری ائعتيراض مکتوبلاری بیله جاوابسیز قالمیش. یعنی قیساجاسی محکمه سیز و بللی اولمایان دلیللره گؤره دیلماجین دیلینی قاپاتمیشلار. گینه عئینی سورو ذئهنیمده جانلاندی، دیلماج ایشله دییی هانگی سوچون بدلینی اؤدور؟

سون ایللرده دیلماجی اوخویوب و اوندان اؤیره ندیکلریم سینئما پرده‌سی کیمین گؤزومون اؤنوندن گئچدی:

- تحریف اولونان تاریخیمیزین اوزمانلار طرفیندن آراشدیریلماسی و اونونلا ایلگیلی یازیلار
- آرکئولوژیک آراشدیرمالارین اورتایا چیخارتدیغی اؤنه ملی بیلگیلر
- ایندییه قده ر تانیما شانسیمیز اولمایان عالیملریمیز و صنعتکارلاریمیزین تانیتیلماسی و ده يه رله ندیریلمه‌سی، اونلارینان آپاریلان موصاحیبه لر
- دیلیمیزده چیخان مطبوعات تاریخی حاققیندا اؤنه ملی بیلگیلر
- آنا دیلیمیز حاققیندا یازیلار، بو قونودا آپاریلان چوخ یؤنلو و بیلیمسل آراشدیرمالار
- فولکلور، موسیقیمیز و صنعتچیلریمیز حاققیندا بیلگیلر

- قادین سورونونا اؤنه ملی بیر یاخلاشیمنان تورک قادینی‌نین گئرچک گوجونو و اؤزونو تانیتماق و هر شئیدن اؤنه ملی دونیا قادینلار گونونده درگی‌نین تمامن بو مساله‌یه حصر ائدیلمه‌سی و مسول قادینلار طرفیندن یؤنه تیلمه‌سی و

- ...

بونلار عاقلیمدان گئچینجه سورومون جاوابینی آلمیش اولدوم. دیلماجین سوچو بللیدیر:

آیدینلاتماق، تحریف اولونان تاریخین گئرچک اوزونو گؤسته رمک، دیلیمیزین اینجه‌لیکلرینی اورتایا چیخارماق و قیساجاسی، بیر خالقین وار اولماسی ایچین گره کن ده يه رلره صاحیب چیخماق و اونلاری یایماق.

آنا دیلیمیزین اؤنه ملی سنگرلریندن بیری اولان دیلماجیمیزا و چئشیتلی زامانلار ایچینده قاپاتیلان یایینلاریمیزا صاحیب چیخالیم و اونلاری اسارتدن قورتارماق اوچون:

- 21 فئوريیه‌نی آنا دیلی گونو،3 مایی مطبوعات گونو ائعلام ائله یه ن یونئسکویا
- اینسان حاقلاری کومیسیيونلارینا
- دونیا یازارلار جمعیيتینه
- سینیرسیز قازئته‌جیلر درنه يینه
- سانسورسوز مطبوعات اوچون ساواشان اورقانیزاسیونلارا

باش وورالیم

باخاق گؤره ک اؤزوموزون و اولوسلارآراسی اورقانیزاسیونلارین ویجدانلاری هله اویاق می؟