اينسان حاقلاري ائوره¬نسل بيلديرگه¬سي
-------------------------------------------------------------------------------
چئويره¬ن: علي بيگلو-2003
-------------------------------------------------------------------------------
١٠ دئسامبر ١٩٤٨ تاريخينده بيرله¬شميش ميللتلر تشكيلاتينين عومومي مجمعينده تصويب اولونان اينسان حاقلاري ائوره¬نسل بيلديرگه¬سي٬ بير گيريش و اوتوز مادده¬دن اولوشور. او گوندن بري بيلديرگه¬نين تصويب اولوندوغو ١٠ دئسامبر٬ بوتون دونيادا "اينسان حاقلاري گونو" آدييلا قوتلانير. مجمع تشكيلاتا عوضو اولان بوتون دؤولتلردن بو تاريخي آندلاشمانين٬ اؤلكه¬لر و يوردلارين سياسي دوروموندان آسيلي اولمادان٬ "گؤزلر اؤنونه سريلمه¬سي٬ هر يئرده آچيقلانماسي٬ ياييلماسي٬ يوروملانماسي٬ باشليجا اوخوللار و باشقا اؤيره¬نيم قوروملاريندا اوخودولماسيني" ايسته¬ميشدير.

اينسان حاقلاري عومومي بياننامه¬سي

اؤن سؤز

اينسانليق عاييله¬سينين بوتون عوضولرينده بولونان (وار اولان) حئيثييتين و اينسانلارين دنك (برابر) و آيريلماز حاقلارينين تانينماسينين٬ اركينلييين (آزادليغين)٬ عدالتين و دونيا باريشينين (دينجلييينين) بينؤوره¬سي اولماسيني گؤز اؤنونده توتاراق؛

اينسان حاقلارينين تانينماماسي٬ كيچيمسه¬نمه¬سي (خور گؤرولمه¬سي) و نيفرتين٬ اينسانليق اوياتيني (ويجدانيني) باش قالديرييا (عوصيانا) ايته¬له¬ين (سئوق ائده¬ن)٬ دهشت وئريجي ييرتيجيليقلارا ندن (سبب) اولماسيني گؤز اؤنونده توتاراق؛

اينسانلارين قورخو و يوخسوللوقدان قورتولموش٬ ايچينده سؤز و اينانما آزادليقلارينا (اركينليك¬لرينه) يييه (صاحيب) اولاجاقلاري بير دونيانين قورولماسيني اؤزلرينين ان يوكسك آماجلاري اولاراق بيان ائتميش بولونمالاريني گؤز اؤنونده توتاراق؛

اينسانين ظولم و باسقييا قارشي سون چيخار يولو (چاره) اولاراق قيياما قالخماغا مجبور قالماماسي اوچون٬ اينسان حاقلارينين بير حوقوق دوزه¬ني (رئژيمي) و ياسا حاكيمييتي ايله قورونماسينين كؤكلو (اساسلي) بير گره¬كسينيم (ضرورت) اولدوغونو گؤز اؤنونده توتاراق؛

اولوسلارآراسيندا دوستجا ايليشگيلرين (علاقه¬لرين) گليشديريلمه¬سيني تشويق ائتمه¬نين كؤكلو (اساسلي) بير گره¬كسينيم (ضرورت) اولدوغونو گؤز اؤنونده توتاراق؛

بيرله¬شميش ميللتلر خالقلارينين٬ آندلاشمادا٬ اينسان آناحاقلارينا٬ اينسان شخصييتينين حئيثييت و ديه¬رينه٬ كيشي و قادينلارين حوقوق دنك¬لييينه (برابرلييينه) اولان ايناملاريني بير يول داها بيلديرميش اولمالاريني گؤز اؤنونده توتاراق؛

و ايجتيماعي ايره¬ليله¬مه¬ني قولايلاشديرماغا٬ داها گئنيشراق بير آزادليق (اركينليك) ايچه¬ريسينده داها ياخچيراق ياشام (حيات) قوشوللاري (شرطلري) قورماغا قرار قيلديقلاريني بيلديرميش بولونمالاريني گؤز اؤنونده توتاراق؛

عوضو دؤولتلرين بيرله¬شميش ميللتلر تشكيلاتي ايله ايشبيرليك (امكداشليق) ائده¬رك٬ اينسان حاقلارينا و آنا اركينليكلرينه (آزادليقلارينا) بوتون دونيادا گئرچكدن سايقي گؤرسه¬ديلمه¬سي و اونلارا عمل اولونماسينا يارديم ائتمه¬يي اؤز اوزه¬رلرينه گؤتورموش اولمالاريني (اوستله¬نديكلريني) گؤز اؤنونده توتاراق؛

بو حاقلار و اركينليكلرين (آزادليقلارين) نئجه¬لييينين (كاراكتئرينين) هاميجا بنزه¬ر و دولوق (تام) بير بيچيمده (شكيلده) باشا دوشولمه¬سينين يوخاريداكي عؤهده¬ليكلرين هر يؤنلو (طرفلي) يئرينه گتيريلمه¬سي اوچون سون درجه اؤنه¬م (اهمييت) قازانديغيني گؤز اؤنونده توتاراق:

بيرله¬شميش ميللتلر باش آسئمبليياسي

اينسانليق توپلولوغون بوتون بيرئيلري (فردلري) ايله قوروملارينين بو بيلديرگه¬ني (بياننامه¬ني) داييمن بير قيلاووز كيمي گؤز اؤنونده توتاراق٬ اؤيره¬تيم و بيليم يولويلا آنيلان (ذيكر ائديله¬ن) بو حاقلار و اركينليكلره سايقي گليشديرمه¬يه؛

گئتديكجه آرتان ميللي و اولوسلارآراسي اؤنله¬ملرله (تدبيرلرله)٬ گره¬ك دوغرودان تشكيلاتا عوضو اولان دؤولتلرين اهاليسي٬ گره¬كسه بو دؤولتلرين ايداره¬سي آلتينداكي اؤلكه¬لرين جيغيرلاري (حودودلاري) ايچينده ياشايان اهاليسي آراسيندا٬ بو حاقلارين دونياجا فئعلن و ائتگيلي بير بيچيمده تانينماسيني و اويقولانماسيني ساغلامايا چاليشمالاري آماجييلا؛

بوتون خالقلار و بوتون دؤولتلر اوچون اولاشيلاجاق٬ يئرينه يئتيرمه¬يه جان آتمالي اولدوقلاري اورتاق ايدئال اولاراق٬ ايشبو اينسان حاقلاري ائوره¬نسل بيلديرگه¬سيني ائعلان ائده¬ر:

مادده بير:
بوتون اينسانلار حئيثييت و حاقلار باخيميندان دنك (برابر) و اركين (آزاد) دوغولارلار٬ اوس (عقل) و اويات (ويجدان) ييه¬سيديرلر و بير بيرلرينه قارشي قارداشليق روحو ايله داورانماليديرلار.

مادده ايكي:
هامي سوي-عيرق٬ دري بوياغي٬ جينسييت٬ ديل٬ دين٬ سيياسي و يا هر هانسي باشقا بير اينانج٬ ميللي باغليليق و يا ايجتيماعي كؤك چيخيشيندان (منشاييندن)٬ بايليق (ثروت)٬ سوسييال قونوم (موقئعييت)٬ دوغوش و يا اوخشار هر هانسي بير باشقاليق- اؤزگه¬ليكدن (غئيرييتدن) آسيلي اولماياراق٬ ايشبو بياننامه¬ده بيلديريله¬ن بوتون حاقلار و بوتون اركينليكلرين (آزادليقلارين) هاميسيندان يارارلانابيله¬ر.

بوندان باشقا شخصين باغلي بولوندوغو و اويروغو اولدوغو اؤلكه و يا يورد - باغيمسيز يورد (مملكت) اولسون٬ وصايت آلتيندا بولونسون٬ اؤزباشينا دولانديريلمايان (غئير-ي موختار) و يا باشقا هر هانسي شكيلده حؤكمرانليق قيسيتلاماسينا (محدودلاشديريلماسينا) تابئع اؤلكه اولسون- بير شخص حاققيندا٬ اويروغو بولوندوغو يورد (مملكت) و يا اؤلكه¬نين سياسي٬ حوقوقي و يا اولوسلارآراسي دورومو (ايستاتوسو) باخيميندان هئچ بير آيريمچيليق (تبعيض) گؤزه¬تيلمه¬يه¬جك.

ماده اوچ:
ياشاماق٬ اركينليك (آزادليق) و شخصي توخونولمازليق هر بيرئيين (فردين) حاققيدير.

مادده دؤرد:
هئچ كيم كؤله¬ليك و يا قوللوق آلتيندا ساخلانيلابيلمه ز٬ كؤله¬چيليك و قول آليش وئريشي (تيجارتي) هر دورلو گؤرونوشو (شكلي) ايله ياساقدير و بوتون بيچيملرده (فورملاردا) قاداغان ائديلير.

مادده بئش:
هئچ كيم ايشكنجه¬يه٬ آجيماسيز (رحمسيز)٬ اينسانليق ديشي (غئير-ي اينساني)٬ شخصييتيني آلچالدان جزالار و يا داورانيشلارا معروض قالماماليدير.

ماده آلتي:
هر بير اينسان هاردا٬ هانسي يئرده اولماسيندان آسيلي اولماياراق٬ اؤز شخصي حوقوقونون تانينماسي حاققينا يييه¬دير (صاحيبدير).

مادده يئتدي:
بوتون اينسانلار ياسالار قاباغيندا دنكديرلر و آيريم (فرق) اولمادان٬ قانونون ائشيت (مساوي) قورونماسيندان يارارلانما (فايدالانما) حاققينا يييه¬ديرلر. بوتون اينسانلارين ايشبو بيلديرگه¬يه (بياننامه¬يه) ترس اولان هر چئشيد (نوع) آيري سئچگيلييه و بئله بير آييرد ائديجي داورانيشلار اوچون ياپيلاجاق هر جور قيشقيرتما و چابايا (جهده) قارشي٬ ائشيت قورونما حاققي واردير.

مادده سككيز:
هر بير شخصين بيله¬سينه آناياسا و يا باشقا ياسالار طرفيندن تانينان آناحاقلارا ترس دوشه¬ن (حاقلاريني پوزان) داورانيشلارا قارشي٬ عملي سونوج (نتيجه) وئره¬جك بيچيمده٬ يئتگيلي (صلاحييتلي) ميللي محكمه¬لرده٬ اؤز حاقلاريني ديككه¬لديرمك (برپا ائتمك) اوچون باش وورما (موراجيعت ائتمه) حاققي واردير.

مادده دوققوز:
هئچ كيمسه كئيفي اولاراق و اؤزباشيناليقلا توتوقلانانماز٬ توتساق ائديليب ساخلانيلانماز و يا قووولوب سورگونه گؤنده¬ريله¬بيلمه ز.

مادده اون:
هر بير اينسان اؤزونون حاقلارينين و بورجلارينين و يا بيله¬سينه قارشي ايره¬لي سورولموش جزايي نئجه¬ليكده (ماهييتده) اولان هر هانسي بير سوچلامانين (ايتتيهامين) دوغرولوغونون ايثبات ائديلمه¬سينده٬ داعواسينين باغيمسيز (موستقيل) و يانسيز (طرفسيز) بير محكمه طرفيندن٬ عدالتين بوتون گره¬كلري گؤزله¬نيلميش بير بيچيمده (شكيلده)٬ دولوق (تام) بير دنكليك و آچيق اولاراق گؤرولمه¬سي حاققينا يييه¬دير.

مادده اون بير:
1- سوچ ايشله¬مكدن سانيق (مظنون) بولونان هر بير شخص٬ ساوونماسي (مودافيعه¬سي) اوچون اؤزونه گره¬كلي (لازيم اولان) بوتون اولاناقلارين (ايمكانلارين) ساغلانميش بولوندوغو (ياراديليب وئريلميش)٬ آچيق بير يارقيلامادا (موحاكيمه¬ده)٬ ياسالارا داياناراق سوچلو اولدوغو ايثبات اولانا دك٬ سوچسوز (معصوم) ساييلير.

2- هئچ كيم تؤره¬ديلديكلري سيرادا (دؤورده) ميللي ياسالار و يا اولوسلارآراسي حوقوقا گؤره سوچ ساييلمايان ائيله¬ملردن (فئعللردن) و يا يانيلقيلاردان (ائهماللاردان) اؤتورو محكوم ائديله¬بيلمه ز. بونون كيمي٬ هئچ كيمه سوچون ايشله¬ندييي سيرادا اويقولانابيله¬جك اولان جزادان داها آغيرراق بير جزا وئريله¬نمه ز.

ماده اون ايكي:
هئچ كيمسه اؤزه¬ل و عاييله ياشامي (حياتي)٬ قونوتونون (مسكنينين) توخونولمازليغي و يا يازيشماسينين گيزلينلييي خوصوصلاريندا اؤزباشيناليقلا قاريشمالارا (موداخيله¬لره)٬ اولولوق (شرف) و اونونه (شؤهرتينه) قارشي تجاووزلارا معروض بيراخيلانماز٬ بونلارا قصد ائديله¬نمه ز. هر بير اينسانين بئله¬نچي كئيفي قاريشمالار و تجاووزلارا قارشي٬ ياسالار يولو ايله قورونما حاققي واردير.

مادده اون اوچ:
1- هر بير اينسان هر هانسي بير دؤولتين جيغيرلاري (حودودلاري) ايچه¬ريسينده اركينجه (آزادجا)٬ بير يئردن باشقا بير يئره گئتمه٬ دولانما و ياشاماق آماجييلا يئرله¬شمه يئري سئچمه حاققينا يييه¬دير.

2- هر بير اينسان٬ اؤز اؤلكه¬سي ده داخيل اولماق اوزره٬ ايسته¬دييي هر هانسي بير اؤلكه¬دن چيخيب گئتمه (ترك ائتمه) و اؤز اؤلكه¬سينه قاييديب گلمه حاققينا يييه¬دير.

مادده اون دؤرد:
1- هر بير شخص ظولم قارشيسيندا قاچيب باشقا اؤلكه¬لردن سيغيناجاق آختارماق٬ سيغينماچي (مولتجي) اولاراق قبول ائديلمه ايسته¬يينده (طللبينده) بولونماق و بو اؤلكه¬لر طرفيندن سيغينماچي موعاميله¬سي گؤرمك حاققينا يييه¬دير.

2- بو حاق٬ گئرچكدن سيياستله ايلگيلي (علاقه¬لي) اولمايان عادي (جينايي) بير سوچا و يا بيرله¬شميش ميللتلر پيرينسيپ و آماجلارينا ترس گله¬ن فعالييتلر سونوجونداكي (نتيجه¬سينده¬كي) ياپيلان قوووشدورمالار (تعقيبات) دوروموندا٬ ايره¬لي سوروله¬نمه ز.

مادده اون بئش:
1- هر بير اينسانين اويروقلوق (تابيعييت) حاققي واردير.

2- هئچ كيمسه اؤزباشيناجا اويروقلوغوندان و اويروقلوغونو دييشديرمك حاققيندان يوخسون بيراخيلانماز (محروم ائديله¬بيلمه ز).

مادده اون آلتي:
1- ائوليليك چاغينا (يئتكينليك ياشينا) چاتان هر كيشي و قادينين٬ سويكؤك (عيرق)٬ اويروق (تابيعييت) و يا دين باخيميندان هئچ بير قيسيتلامايا (محدودييته) تابئع اولماقسيزين٬ ائوله¬نمك و عاييله قورماق حاققي واردير. هر كيشي و قادين ائوله¬نمك قونوسوندا (مووضوعسوندا) ائوليلييه باشلاركن٬ ائوليليك بويونجا و ائوليلييين سونا چاتماسي (پوزولماسي) زاماني٬ دنك (برابر) حاقلارا يييه¬دير.

2- ائوله¬نمه عقدي (نيكاح) يالنيز گله¬جك ائشلرين (ائوله¬نن هر ايكي طرفين) اركين (آزاد) و دولوق (تام) اولورو (ريضاسي) ايله قيييلابيله¬ر.

3- عاييله٬ توپلومون (جمعييتين) دوغال (طبيعي) و باشليجا عونصورو اولوب٬ توپلوم (جمعييت) و دؤولت طرفيندن قورونماق حاققينا يييه¬دير.

مادده اون يئددي:
1- هر بير شخص تك باشينا و يا باشقالاري ايله بيرگه٬ مال و مولك صاحيبي اولماق حاققينا يييه¬دير.

2- هئچ كيمسه كئيفي اولاراق (اؤزباشيناليقلا) مال و مولكوندن يوخسون (محروم) قيلينابيلمه ز.

مادده اون سككيز:
هر بير شخصين٬ دوشونجه٬ اويات (ويجدان) و دين اركينلييي (آزادليغي) حاققي واردير. بو حاق٬ اؤز ديني و يا اينانجيني دييشديرمك آزادليغيني (اركينليييني)٬ دينيني و يا اينانجيني تكليكده يا دا باشقلاري ايله بيرليكده توپلوجا٬ آچيق و يا اؤزه¬ل (خوصوصي) بيچيمده (صورتده)٬ اؤيره¬نمك٬ ياشاما گئچيرتمك (تطبيقات)٬ عيبادت ائتمك (قوللوق ائتمك) و يا ديني دبلر و باشقا اوخشار تؤره¬نلرله (مراسيملرله) ادا ائتمك٬ يئرينه يئتيرمك آزادليغيني (اركينليييني) ايچه¬رير.

مادده اون دوققوز:
هر بير اينسانين دوشونجه و بو دوشونجه¬لريني آچيقلاماق اركينلييي (آزادليغي) واردير. بو حاق٬ دوشونجه¬لريندن اؤتورو راحاتسيز ائديلمه¬مك٬ دؤولت جيغيرلاريندان (آراچكلريندن) باغلي اولمادان٬ بيلگي (معلومات) و دوشونجه¬لري ايسته¬نيله¬ن هر هانسي آراج (واسيطه) ايله آختارماق٬ اونلاري الده ائتمك و يا يايماق حاققيني ايچه¬رير.

ماده ييرمي
1- هر شخص دينج توپلانما (ييغيشما)٬ ييغيناجاقلار دوزه¬لتمه٬ درنه¬ك قورما و درنه¬يه قوشولما اركينلييينه (آزادليغينا) يييه¬دير.

2- هئچ كيمسه هر هانسي بير درنه¬يه گيرمه¬يه مجبور ائديله¬نمه ز.

مادده ييرمي بير:
1- هر شخص٬ دوغرودان دوغرويا و يا اركينليك (آزادليق) ايله سئچيلميش وكيللر آراجيليغي (واسيطه¬سي) ايله٬ اؤز اؤلكه¬سينين دؤولت ايشلريني دولانديرماغا قاتيلما حاققينا يييه¬دير.

2- هر شخص اؤز اؤلكه¬سينين دؤولت خيدمتينه گيرمك و قوللوق ائتمك اوچون دنك (ائشيت) حاقلارا يييه¬دير.

3- خالقين ايسته¬نجي (ايراده¬سي) حؤكومت اركينين (ايقتيدارينين) قايناغيني اولوشدورماليدير. بو ايسته¬نج (ايراده)٬ گيزلين بيچيمده (شكيلده) و يا اركينلييي (آزادليغي) ساغلاياجاق اونا دنك (موعاديل) اولان باشقا بير يؤنته¬م (اوصول) ايله گئچيريله¬جك٬ ائشيت (دنك) سس وئرمه يولويلا ياپيلاجاق دوغرو و دوزگون٬ عومومي و سوره¬كلي (داواملي) سئچيملرله اوزه چيخماليدير.

مادده ييرمي ايكي:
هر بير شخصين٬ توپلومون (جمعييتين) بير عوضوو كيمي٬ سوسييال گووه¬نلييه (تامينات) حاققي واردير. هر بير اينسانين حئيثييتي و شخصييتينين اركينجه (آزادجا) گليشمه¬سي اوچون گره¬كلي (ضروري) ايقتيصادي٬ ايجتيماعي و مدني حاقلارين ميللي چابا (سعي) و اولوسلارآراسي ايشبيرلييي (امكداشليغي) يولو ايله و هر بير دؤولتين قورولوش ياپيسي و قايناقلارييلا اورانتيلي (موتناسيب) اولاراق گئرچكله¬شديريلمه¬سينه حاققي واردير.

مادده ييرمي اوچ:
1- هر بير شخصين ايشله¬مه¬يه٬ ايش و ايش يئريني اؤز ايسته¬يي ايله٬ آزادجا (اركينجه) سئچمه¬يه٬ عدالتلي و الوئريشلي (موناسيب) ايش قوشوللارينا (شرطلرينه) و ايشسيزليكدن قورونمايا حاققي واردير.

2- ايشله¬ين هر بير شخصين٬ هئچ بير آيريمچيليق گؤزه¬تيلمك¬سيزين٬ ائشيت (دنك) ايش قارشيليغيندا٬ ائشيت (دنك) اؤده¬نه¬ك (اوجرت) آلماغا حاققي واردير.

3- ايشله¬ين هر كيمسه امه¬يينين٬ اؤزونه و عاييله¬سينه اينسانليق حئيثييتينه اويقون بير ياشاييش و دولانيشيق ساغلايابيله¬ن و گره¬ك اولسا باشقا هر دورلو سوسييال قوروما آراجلاري ايله (واسيطه¬لرييله) ده بوتونله¬نن (تكميل اولان) عدالتلي و الوئريشلي اؤده¬نيلمه¬سي حاققي واردير.

4- هر بير اينسانين سوسييال ماراق و چيخارلارينين (منفعتلرينين) قورونماسي دوغرولتوسوندا٬ ايشچي بيرليكلري (سنديكالار) قورمايا و بونلارا گيرمه¬يه حاققي واردير.

ماده ييرمي دؤرد:
هر بير شخصين دينله¬نمه¬يه –دينجه¬لمه¬يه٬ ائيله¬نمه¬يه٬ بو آرادا ايشله¬مه سوره¬سينين (موددتيني) (ايش گونونون) معقول صورتده قيسيلماسينا (محدود توتولماسينا) و بللي آراليقلارلا (فاصيله¬لرله) اؤده¬نه¬كلي (اوجرتلي) تعطيللره حاققي واردير.

مادده ييرمي بئش:
1- هر بير اينسانين گره¬ك اؤزو٬ گره¬كسه عاييله¬سي اوچون يييه¬جك٬ گيييم٬ قونوت (ياشاييش يئري)٬ ساغليق باخيمي٬ گره¬كلي اولان سوسييال خيدمتلر داخيل اولماق اوزره٬ ساغليغي و ريفاهيني تامين ائتمك و ساخلاماق اوچون اويقون بير ياشام سوييه¬سينه و ايشسيزليك٬ سايريليق (خسته¬ليك)٬ چولاقليق (سقطليك)٬ دوللوق٬ قوجاليق (ياشليليق) و يا اؤزونه باغلي اولمايان ندنلر اوزوندن بيله¬سيني گئچيم اولاناقلاريندان (ايمكانلاريندان) يوخسون (محروم) بيراخان باشقا دوروملاردا گووه¬نليييه (تامين ائديلمه¬يه) حاققي واردير.

2- آنا و بالا اؤزه¬ل ايلگي (قايغي) و يارديم آلماق حاققينا يييه¬ديرلر. اوشاقلارين هاميسي ائوليليك ايچينده (نيكاحلي) و يا ديشيندا (نيكاحسيز) دوغولانلار٬ بنزه¬ر سوسييال قورونمادان يارارلانيرلار (فايدالانيرلار).

مادده ييرمي آلتي:
1- هر شخصين اؤيره¬نيم (بيليم آلماغا) حاققي واردير. ان آزي ايلك (باشلانقيج) و عومومي اؤيره¬نيم آغچاسيز (پولسوز) و موفت اولماليدير. ايلك اؤيره¬تيم حؤكمن و مجبوريدير.

2- تئكنيك و مسلكي اؤيره¬تيمدن هامي يارارلانا (ايستيفاده ائده) بيلمه¬ليدير. يوكسه¬ك اؤيره¬تيم٬ هره¬نين باجاريغينا گؤره٬ هامييا دولوق (تام) ائشيتليكده آچيق اولماليدير.

3- اؤيره¬تيم٬ اينسان شخصييتينين اسكيك¬سيز گليشمه¬سينه يؤنه¬لديلمه¬لي و اينسان حاقلارييلا آنااركينليكلره (تمل آزادليقلارا) اولان سايقينين گوجله¬نمه¬سيني آماجلاماليدير (هدف آلماليدير). اؤيره¬تيم بوتون اولوسلار٬ سويكؤك (عيرق) و دين توپارلاري (قوروبلاري) آراسيندا قارشيليقلي آنلاييش (دوشونوش)٬ اويوم٬ دؤزوملولوك (تلرانس)٬ كؤمكله¬شمه و آرخاداشليغين (دوستلوغون) بركيديلمه¬سيني تشويق ائتمه¬لي و بيرله¬شميش ميللتلرين باريشي ساخلاماق (دينجلييين قورونماسي) يولونداكي قوللاما چاليشمالارينا يارديم ائتمه¬ليدير.

آنا ايله آتا٬ آزياشلي اوشاقلارينا وئريله¬جك اؤيره¬تيمين (تحصيلين) چئشيديني سئچمكده اؤنجه¬ليك و اوستونلويه صاحيبديرلر.

مادده ييرمي يئتدي:
1- هر بير اينسان٬ توپلولوغون مدني چاليشمالارينا اركينجه (آزادليقلا) قوشولماق٬ گؤزه¬ل صنعتلري دادماق (ذؤوق آلماق)٬ بيليم آلانينداكي ايره¬ليله¬ييشه قاتيلماق و بونلارين نئعمتلريندن يارارلانماق حاققينا يييه¬دير.

2- هر بير اينسانين ياراتديغي هر دورلو (نوع) بيليم٬ ادبي و يا اينجه صنعت ياپيتلاريندان (اثرلريندن) تؤره¬ديلن معنوي و ماددي قازانجلارين (منفعتلرين) قورونماسينا حاققي واردير.

مادده ييرمي سككيز:
هر بير اينسانين٬ ايشبو بيلديرگه¬ده يانسيديلميش (عكس ائتديريلميش) حاقلار و اركينليكلرين اسكيك¬سيز ياشاما گئچيرتمه¬سيني ساغلاياجاق بير سوسييال و اولوسلارآراسي دوزومه (نيظاما) حاققي واردير.

مادده ييرمي دوققوز:
1- هر بير اينسانين٬ شخصييتينين اركين (آزاد) و اسكيك¬سيز (دولوق) گليشمه¬سي تكجه بير توپلولوق ايچينده مومكوندور و شخصين بو توپلولوغا قارشي وظيفه¬لري (بورجلاري) واردير.

2- هر بير اينسان٬ اؤز حاقلارينين و اركينلييينين (آزادليغينين) قوللانيلماسيندا٬ تكجه باشقالارينين حاقلارينين و آزادليقلارينين گره¬يينجه تانينماسي و بونلارا سايقي گؤسته¬ريلمه¬سي آماجييلا و يالنيز دئموكراتيك بير توپلومدا (جمعييتده) اخلاقين٬ عومومي دوزه¬نين (نظمين) و ريفاهين حاقلي گره¬كلريني (ايجابلاريني) يئرينه گتيرمك مقصدييله٬ ياسالار طرفيندن بليرله¬نميش (گؤسته¬ريله¬ن) قيسيتلامالارا (محدودييتلره) تابئع توتولابيله¬ر.

3- بو حاقلار و اركينليكلر٬ هئچ بير وجهله بيرله¬شميش ميللتلرين آماج و پيرينسيپلرينه ترس اولاراق ايشله¬ديله¬بيلمه ز.

مادده اوتوز:
ايشبو بياننامه¬نين هئچ بير حؤكمو٬ هر هانسي بير دؤولته٬ اينسان توپارينا (زومره¬سينه) يا دا آيري آيري شخصلره٬ بو بياننامه¬ده ديله گتيريله¬ن حاق و اركينليكلري يوخ ائتمه¬يه يؤنه¬ليك بير چاليشمايا (فعالييته) گيريشمه يا دا ائيله¬مي (فئعلي) تؤره¬تمه حاققيني وئرير بيچيمده يوروملانانماز.