دويورو: ت.د.پ.نين اٶنه ردييي بايراغين، ميللي پارتي طرفيندن قوللانيلماسينا ائعتيراض
-------------------------------------------------------------------------------
ت.د.پ.

-------------------------------------------------------------------------------
ياخين گئچميشده اينتئرنئت اورتاميندا "ميللي پارتي" آدلي، يئني بير گونئي آزربايجانلي پارتينين قورولدوغو بيلديريلميشدير.

اوزوله ره ك يئني قورولان ميللي پارتينين آمبلئمي، بيزيم گونئي آزربايجان´ا بيري ١٩٩٤ و اٶته كي ٢٠٠٧ ايللرينده اٶنه رديييميز ايكي بايراغين بيرله شمه سيندن اورتايا چيخيبدير.

البتته هامي باشقالاريندان ايلهام آلابيله ر، آنجاق بئله بير شئيين اولماماسيني، هامينين اٶز اوريژينال فيكير و امه كلرينه سٶيكه نمه سيني، باشقالارينينكينا ايسه سايغي گٶسته رمه سيني- اونلاري اٶزلرينينكي كيمي گٶسته رمه مكله- يئيله رديك.

آيريجا بو فورصتدن يارارلاناراق، ت.د.پ.نين هيچ بير شكيل و سوييه ده يئني قورولان ميللي پارتي ايله هر هانسي بير باغي و ايليشگيسي اولماديغيني وورقولاييريق.

ت.د.پ.

DUYURU

Yaxın geçmişdə internet ortamında "Milli Parti" adlı yeni bir Güney Azərbaycanlı partinin qurulduğu bildirilmişdir.

Üzülərək yeni qurulan "Milli Parti"nin amblemi, bizim Güney Azərbaycan'a biri 1994 və ötəki 2007 illərində önərdiyimiz iki bayrağın birləşməsindən ortaya çıxmışdır.

Əlbəttə hamı başqalarından ilham alabilər, ancaq belə bir şeyin olmaması və hamının öz orijinal fikir və əməklərinə söykənməsini, başqalarınkına sayqı göstərməsini- onları özlərininki kimi göstərməməklə- yeylərdik.

Ayrıca bu fürsətdən yararlanaraq, TDP'nin heç bir şəkil və səviyyədə yeni qurulan "Milli Parti" ilə hər hansı bir bağı və ilişgisi olmadığını vurqulayırıq.

ت.د.پ.نين ١٩٩٤ده گونئي آزربايجانا اٶنه ردييي بايراق



داها آرتيق بيلگي اوچون آشاغيداكي ايزليكلره باخابيله رسينيز:

http://tedepe.blogspot.com/2007/02/trk-demokratik-platformunun-tdp-nrdiyi_20.html

http://tedepe.blogspot.com/2007/07/blog-post_20.html

ميللي پارتينين ت.د.پ.نين اٶنه ردييي بايراغي ايشله تدييي آمبلئمي
http://www.milliparty.com/

Read more- Ardı- بقيه- آردي

سيرا تئهرانين آلينماسيندادير
-------------------------------------------------------------------------------
ت.د.پ.

-------------------------------------------------------------------------------
گونئي آزربايجاندا سون بير ايلده گئرچه كله شه ن خالق قالخيشي و گئنيش قاتيليملي سيياسي مدني ائيله ملردن (آكسييالاردان) سونرا، آرتيق نه گونئي آزربايجان، نه تورک ميللي دئموکراتيک حرکتي نه ده ايران اسکيسي کيمي دئييلدير و اولانماز. بونا پارالئل اولاراق موباريزه و فعالييت مئتودلاري و شکلي ده گئچميشده کي کيمي اولابيلمه ز. سون اولايلاردا اورتايا چيخان يئني بير اولقو، سيياسي ائيله م و پيروتئستلرين كوتله ويله شه ره ك، آزربايجانين چئوره، شرق و گونئي شهه رلرينه ياييلما مئيلييدير. (سولدوز، زنگان، قوم، همدان و ايسلامشهر). بو اولاي تاريخي، ميللي و سيياسي آچيلاردان سون درجه اٶنه مليدير.

تئهران، ايرانين باشكندي، بير آزربايجان و ياري تورك-ياري فارس شهه ردير. بوراسي ان آزيندان ايكي و يا اوچ تورك دٶولتين باشكندي اولوبدور. تئهران پاليغي (كلان شهري) و تئهران اوستانينين توركلرله مسكون اولان اٶته كي بٶلگه لري، گونئي آزربايجان تورپاقلارينا داخيلدير. تئهرانين اهاليسينين ياريسيندان چوخونون تورک اولماسي و باتييا ساري تورک بٶلگه لري و آزربايجانا بيتيشيک اولماسي، بيزيم اليميزده کي چوخ اولوملو بير اولاناق و اوستونلوكدور. بيز بو اولاناغي اوزوله ره ك ايندييه جه ن يئته رينجه ده يه رله نديره نمه ميشيک و بوراداکي تورک خالقيني قازانابيلمه ميشيک. تئهران تورکلريني اويانديرماق، بو شهه رده تورک-فارس آيريشماسي ياراتماق، بيزيم ايستيراتئژيک هدفيميز اولماليدير.

بيزيم، بوتون ايراندا اولدوغو تکين، تئهراندا دا كيچيك و بٶيوك چاپلي تورک آياقلانمالاري، و تورک - فارس آيريشماسي (دوشمنچيلييي دئييل) ياراتماق اساس آماجيميز اولماليدير. بوندان سونرا حرکتين، خييابان گٶسته ريلري، قيياملار، ائعتيصابلار و.س. تئهرانا داشينمالي، سيياسي ائيله ملرين اساس مرکزي تئهران اولمالي و سيويل ايطاعتسيزليك مئتودلاري تئهرانا موتمرکيز اولماليدير. كوتله وي پيروتئست حرکتلرينين تئهرانا ياييلماسي و بورادا سيخجا ياپيلماسي، هم دٶولتي اٶز قالاسيندا وورار، هم اونو هزينه وئرمه يه مجبور ائده ر (باشکندين امنيييتينين پوزولماسي). تبليغاتي يٶندن ده چوخ يارارلي اولار، ان آزيندان تورک ميللي دئموکراتيک حرکتينين دٶولتي اٶز قالاسيندا ووراجاق گوجه صاحيب اولدوغو ايماژيني يارادار. بو ايچه ريده خالقيميز اوزره رينده، فارس خالقي و سيياسي تشكيلاتلاري، دٶولت و خاريجي مئدييا و دٶولتلر اوزره رينده درين موثبت پپسيكولوژيك ائتگيلر يارادار.

تورکييه ده پ.ک.ک. عئيني سيياستي ايستانبولدا و باشقا بٶيوك شهه رلرده ايجرا ائتديکدن سونرا، تبليغاتي جهتدن چوخ باشاري الده ائتدي. ايستانبولدا شهه ر حاشييه لرينده ايشسيز گنجلرين گئنيش قاتيليمي ايله ياپيلان خالق ائيله ملري و .... هم بٶيوک سس گتيردي و دونيادا مونعکيس اولدو، همي ده تورکييه دٶولتينين سيياسي-امنييتي جهتلردن راحاتيني جيددي شکيلده پوزوپ، ايقتيصادي اولاراق توركييه توريسمينه بٶيوک ضربه لر ووردو.

سيياسي تاكتيك قازانيملار آچيسيندان باشكندي ميللي چکيشمه نين ايچينه سوخابيله رسه ک، كسينليكله بٶيوک قازانجلار الده ائده ريک:

١- تئهران، رئژيمين الده ائتدييي يوكسه ك سئوييه لي ياشام و رئفاهي يابانجي مئدييا و دٶولتلره پيروپاقاندا اوچون گٶسته ردييي بير ويتريندير. بورادا مدني اٶزگورلوكلر داها چوخ و دٶولتين آزربايجانين باشقا بٶلگه لرينده خالقي معروض قويدوغو باسقيجي و سيخيشديريجي سيياستلريني اويقولاما شانسي و گوجو داها آزدير. دولاييسي ايله كيچيك شهه رلريميزده ياپيلانمايان بير چوخ ائيله م و گٶسته ري، چوخ راحاتليقلا تئهراندا ياپيلابيله ر و بئله جه ائيله م و گٶسته ريلرين هزينه سي ده- ائيله مچيلر و گٶسته ريچيلر باخيمدان- آزالديميش اولار.

٢- تئهران بير مئتروپولدور. بورادا هر چئشيد پروتئست ائيله مينين ياراديلما، ياييلما، سوردورولمه و يا تئكرارلانما شانسي، اٶزه لليكله ايشسيز کاسيب اهالي و يوسوللوق ايچينده چابالايان حاشييه محلله لرده ياشايان و هر آن پاتلاماغا حاضير گنجلر آراسيندا، چوخ يوكسه كدير.

٣- تبليغاتي و پيروپاقاندا باخيميندان تئهراندا ياپيلان هر ائيله م و گٶسته ري و يا توپلانتينين خبري، تئزليکله گٶروتلو- گٶرونتولو اولاراق خاريجي سفارت، خبر آژانسلاري و خبرنيگارلارا چاتديريلابيله ر. بو دا خبرين اٶلكه ايچي و ديشيندا سورعتله و گنيش شکيلده ياييلماسينا ايمكان يارادار.

٤- بوندان سونرا دٶولت بيزه هزينه تحميل ائتمك يئرينه، اٶزو همي ده اٶز قالاسي و باشكندينده هزينه وئرمه يه مجبور ائديلمه ليدير. بو هزينه ايسه، تئهرانين امنيييتينين پوزولماسي، باشكندده تورک-فارس آيريشماسي و چاتيشما ريسكينين ياراديلماسي ايله اولار.

تئهران مئتروپولو و اوستانيندا ميللي حرکتين يئر ائتمه سي و دابان قازانماسي، گله جک ميللي چيخارلاريميز اوچون اٶنه مليدير:

١- تئهراندا ياپيلان هر هانسي مدني بير چاليشما، ائيله م، گٶسته ري، توپلانتي و ... بورانين تورکلريني اويانديرما و آياغا قووزاما پوتانسييالي واردير. بيليندييي كيمي تئهران تورکلرينين پيسيکولوژيسي، آزربايجانين اٶته كي بٶلگه لريندن آزجا فرقليدير. بيز تئهران تورکلريني حرکته گئچيره بيلمک اوچون بير يوللار تاپماليييق.بورادا ياپيلان مدني ائيله ملر بو يوللاردان بيري اولابيله ر.

٢- تورک و آزربايجان ميللي دئموکراتيک حرکتي تئهراني اله گئچيرمه ديکجه ايراندا هئچ بير قاليجي حاققي الده ائده بيلمه ز. بيز بونو ياخين گئچميشده مشروطييت- ستتارخان، خيياباني، ميللي حٶكومت- پيشه وري، شريعتمداري وس. تجروبه و حرکتلرينده آچيقجا گٶرموشوك. تئهران بوتونويله و يا قيسمن آزربايجانين كونترولونا گئچمه زسه، تورك خالقي و گونئي آزربايجانين الده ائتدييي هئچ بير باشاري قاليجي اوللانماز و هر آن يوخ ائديلمه يه محكومدور. گونئي آزربايجانين اٶز حاقلارينا قاووشماسي تكجه و تكجه تئهرانين گونئي آزربايجانين تركيبينه داخيل ائديلمه سي و بئله جه آزربايجان دٶولتينين بو شهه ر اوزرينده حاكيمييت ساغلاماسي ايله مومكوندور و قارانتي ائديله بيله ر.

٢- يئني مرحله ده، اٶزه لليکله فئدئراليسم آلتئرناتيوي ايرانليلار آراسيندا گوج و يانداش قازانديقجا و آزربايجان-فارسيستان سرحدلرينين جيزيلماسي سيراسيندا، تئهران اوستانيندا يئرله شميش تورك و آزربايجان تورپاقلاريني فئدئرال آزربايجان تورپاقلارينا داخيل ائده بيلمه ك اوچون، بيز تئهران شهه رينين بير آزربايجانلي شهه ر اولدوغو تئزيني، اينديدن و اوتانمادان اورتايا آتيب و تبليغ ائتمه ليييک. مدني پيروتئست حرکتلرينين تئهراندا گئرچه كله شديريلمه سي، بو شهه رين بير تورک و آزربايجانلي شهه ر اولدوغو تئزيني تثبيت ائتمه يه كٶمك ائده ر.

Read more- Ardı- بقيه- آردي

تورك دئموكراتيك پيلاتفورمو (تּدּپּ)´نون اؤنه ردييي بايراق- ١٩٩٤
Türk Demokratik Pılatformu'nun (TDP) önərdiyi bayraq- 1994
-------------------------------------------------------------------------------
د.ت.پ.

-------------------------------------------------------------------------------
جنوبى آزربايجان ميللى بايراغى تاريخيندن:

آشاغيداكى يازى٫ ١٩٩٤- ١٣٧٢ ايلينده جنوبى آزربايجان ميللى بايراغى موضوعسوندا ياييملانميش بير بيلديرينين متنيدير. بو بيلديريده ايلك دفعه اولاراق جنوبى آزربايجان اوچون موسقتيل بير بايراغين ياراديلماسى لوزومونا ايشاره اولونموش و بو آماجلا يئنى بير بايراق تكليف ائديلميشدير.

منطقه ميزده دئموكراتيكله شمه حركتينين گئنيشله مه سى٫ ايران توركلرى آراسيندا كيمليك آختاريشينين سورعت قازانماسى و ايران'دا فئدئرال سيستئمه گئچيشين گئرچك بير آلتئرناتيوه دؤنوشدويو بو گونلرده٫ بير سيرا آزربايجانلى سيياسى تشكيلاتلارين تاريخى عنعنه لر و دئموكراتيك پرنسيبلرى هئچه ساياراق٬ اؤزلرينين ايجاد ائتدييى بايراقلاري "تكليف" يئرينه٬ "جنوبى آزربايجان بايراغى" دييه خالقيميزا تحميل ائتمه سينه تانيق اولماقداييق.

بو شراييطده آزربايجان'ين سيياسى ياشاميندا دئموكراتيك پيرنسيبلرين و دئموكراسى آنلاييشينين كؤك سالماسينا يارديمچى اولماق٫ بئله نچى آنتى دئموكراتيك رفتارلارى٫ دئسپوتيسم و توتاليتاريسم مئييللرينى ردد و تنقيد ائتمك آدينا٫ آدى گئچه ن بيلديرى آشاغيدا عئينييله وئريلميشدير.

ميللى بايراغيميز
١٩٩٤- ١٣٧٢

بوگونگو ايران بايراغى تورك- آزربايجانلى منشاليدير. (باخين "ايران بايراغينين تورك-آزربايجانلى اولوشو حاققيندا"يا). بو بايراغين فارس شووئنيستلرجه منيمسه ندييى و ايران و دونيادا فارسليق-ايرانليليقلا بيرله شديريلدييينى نظرده توتاراق جنوبى آزربايجان ميللى بايراغى سئچيمينده ترك ائديلمه سينى اويغون گؤردوك.

تكليف ائديله ن ميللى بايراغيميز:

بو بايراقدا اوچ شريدلى زمين شيمالى آزربايجان بايراغيندا اولدوغو كيميدير. بو ايسه گونئى و قوزئى آزربايجان'ين اصلينده تك بير اولوشوم اولدوقلاريني وورقولار.

بو بايراقدا ياشيل٫ "ايسلام"٫ "اون ايكى ايمامليليق"٫ قيرميزى "اوغوز سلجوقلو دؤولتى" و "اينقيلاب" ٫ گؤى ايسه "باريش" و "چاغداشليق" سمبولودور.

اودلار يوردو

بايراغين اورتاسينداكى فيگور ايسه شيمالى آزربايجان'ينكيندان فرقليدير. بو جنوبى آزربايجان ميللي سووئره نليك حركتينين خاريجى اؤلكه لردن قايناقلانماديغينى٫ اونلارا باغلى اولماديغينى و اؤزونه مخصوص ديناميزمى ايله اورتايا چيخديغينى وورقولاماق اوچوندور.

بايراغين اورتاسينداكى گونش "گوج" و" آيدينليق"ى٫ آيريجا "تبريز"ى٫ تمثيل ائده ر. بيرله شميش آزربايجان'ين ابدى پايتاختى تبريز حاققيندا م. جلال الددين رومى بئله دئميش: "تبريز گونشى قارشيسيندا باشينى يئره قوى٫ چونكو او صنمه سجده٫ ايمانين لاپ اؤزودور. (1)

"آيدينليق"ى تمثيل ائده ن شوعاعلارين اون ايكى دنه اولماسى٫ آزربايجان تورك ميللتينين ميللى مذهبى دييه بيله جه ييميز اون ايكى ايماملى شيعيلييين موتصوويفه قولونون توركى دالى اولان "قيزيلباشليق"ى (علوى و يا اهل-ى حقى) تمثيل ائده ر. آزربايجانلى فيلوسوف م. ف. آخوندوف تورك-آزربايجان قاجار دؤولتينين رسمى قزئتته سى اولان روزنامه ملت سنيه ايران´ين اؤز آمبلئمى اولاراق سئچدييى تئهران´ين مسجيد-ى شاه سمبولو حاققيندا كيريتيكا قزئتينين ١٨٦٦-١-٢٥ تاريخينده بئله يازير: ".... قزئتينيزده ايران´ين سمبولو اولاراق چاپ ائتدييينيز مسجيد رسمينى اويغون گؤرموره م. ....سنه... صفوى شاهلارينى خاطيرلادان .... بير سمبولو تاپمانى لازيم گؤروره م٫ ميثال اولاراق قيزيل قوماشدان دوزه لميش اون ايكى ديليملى تاج فيگورو كيمى...." (2)

اورتاداكى آلوولار آزربايجان´ين "اودلار يوردو" اولدوغونو و بوتون اورتا شرقده بير مشعل كيمى يانديغينى و ايشيق ساچديغينى تمثيل ائده ر. اوچ آلوو ايسه عرب ايشغالچيلارينا قارشى بايبك رهبرلييينده "قيزيل اه يين"٫ شاه ايسماعيل ختايى رهبرلييينده "قيزيلباش" و فارس پهلوى شووئنيسمينه قارشى "آزربايجان ميللى حؤكومتى" حركتلرينى تمثيل ائده ر.

ايران بايراغينين توركى-آزربايجانلى اولوشو حاققيندا

توركى غزنه ليلر بايراقلارى اوزه رينده آسلان٫ هوماى قوشو و قافلان كيمى حئيوان شكيللرى وار ايدى. سولطان محمود قارا زمين اوزه رينده آى٫ سولطان مسعود قارا زمين اوزه رينده آسلان٫ محمود اوغلو محممد٬ قارا زمين اوزه رينده آلتين هوما قوشو٫ دوغان شاه ايسه قافلان رسمى ايشله تميشدير. باشقا غزنه ليلرده ده قارا و بعضن ياشيل و يا قيرميزى بايراق اوزه رينده آسلان و يا قافلان رسمى نقش ائديليبدير.

توركمن سلجوقلولار بايراقلاريندا آسلان٫ قافلان٫ اژدرها ايله آى هيلالى ايشله ديلميشدير. آتابك محممد پهلوان قيرميزى زمين٫ سولطان سنجر قارا زمين اوزه ره٫ توغرول اوغلو آسلان و كؤرپه آسلان اژدها فيگورلارى ايشله تميشلر.

گونش و آسلانين بيرليكده ايشله ديلمه سى قونيا سلجوقلولاريندان سولطان كئيخوسروو غيياث الددين پوللاريندا چاپ ائديلميشدير. (فارس شاعيرى فيردووسى بئله دئميشدير: "توركلرين آيى يوكسه لدييى زامان٫ ايران´ين گونشيندن ضرر گؤره جكدير." سلجوقلولارين فارس تاثيرى آلتيندا اولدوقلارى بيلينير.)

توركى غزنه ليلر و توركمن سلجوقلولاردان چوخ ساييدا آسلانلى بايراق و پول (ميثال اولاراق آرغون خان'ين ١٣ اونجو يوز ايلدن قالان پول) قاليبدير. علا الدين آرسلان زامانيندا آسلان و سيمورغ قوشو فيگورلارى بيرليكده ايشله ديلميشدير.

توركى خارزمشاهلارين قارا بايراغى اوزه رينده آى٫ موغول چنگيز خان بايراغى ايسه آغ دوققوز اينه ك قويروغوندان اولوشموشدور.

موسلمان اولموش موغول حؤكمدارلارى بايراقلاريندا گونش و آسلان بيرليكده٫ تئيمورلولار بايراغيندا ايسه نهنگ و آى هيلالى بيرليكده نقش ائديلميشدير. توركله شميش موغول ائلخانلى شاهلارينين بايراغى آغ رنگينده ايدى. بوتون بو موددتده آسلان باشى فيگورونا دا راستلانير.

آزربايجانلى آغ قويونلو دؤولتى بايراقلاريندا آغ قويون و گونش٫ آزربايجانلى قاراقويونلو دؤولتى بايراقلاريندا ايسه قارا قويون و گونش رسيملرى اولوبدور.

آزربايجانلى صفوى دؤولتى زامانيندا آسلان و گونش فيگورلارى چوخ يايقينلاشيبدير. تورك قيرال شاه ايسماعيل'ين دده سى شئيخ جونئيد٫ گونشلى آسلانى منيمسه ميشدير. بو بايراقلاردا ايشله ديله ن آسلان تانري'نين آسلانى حضرت على´نى٫ قيليج ايسه ذوالفقارى تمثيل ائتمك ده دير. (صفويلر و داها سونرا ايقتيدارا گله ن افشارلارلا قاجارلار اون ايكى ايماملى شيعه لييين موتصوويفه قولونون توركى يورومو اولان قيزيلباشليق مذهبينده ايديلر. بوگون قيزيلباشييه مذهبينين قالينتيلارينا ايران´دا اهل حق٫ توركييه ده ايسه علوى دئييلير.)

آزربايجان قيزيلباش صفوى شاهلاريندان ساده جه شاه ايسماعيل´ين بايراق و پوللاريندا گونش – آسلان رسمى يوخدور. اونون زامانيندا ياشيل زمين اوزه ره آيلى علملر ايشله ديلميشدير.

تورك-آزربايجان افشار قيرالى ناديرشاه زامانيندا گونش٫ آسلان و زوالفقار قيليجى اوچ قيرميزى٫ آغ و گؤى٫ بعضن ده قيرميزى٫ گؤى٫ آغ و سارى شريدلردن اولوشان زمين اوزه رينده نقش ائديلميشدير.

ياشيل٫ قيرميزى و آغ شريدلريندن تشكيل تاپان بوگونكو ايران بايراغينين ايشله ديلمه سى قيرال ناديرشاه زامانيندان باشلاييبدير. بو بايراقدا ياشيل رنگ ايسلام و اون ايكى ايماملى شيعيلييين موقددس رنگيدير. قيرميزى ايسه توركمن سلجوقلو بايراغى رنگيندن آلينيبدير.

آزربايجانلى قاجار قيرالى آغا محممدخان زامانيندا الينده قيلينج اولان آسلان فيگورو ايشله ديلميشدير. آزربايجانلى قاجارلار و اونلاردان قاباقكى آزربايجان شاهلارى آسلانى حضرت-ي على´نين لقبى اولاراق گؤردوكلرى اوچون پوللاريندا "اسدالله (تانرينين آسلانى)" چاپ ائتديريبلر.

مشهور آلمان شاعيرى گوته نين شرق-غرب آدلى ديوانيندا فارسجا بير شئعر واردير. بو شئعرى ايرانين ١٨٠٩ دا اينگيلتره سفيرى و داها سونرا ١٨٢٤ ده آزربايجانلى قيرال فتحعليشاه قاجار'ين خاريجى ايشلر ناظيرى حاج ميرزه حسن خان شيرازى ائلچى اؤزو ايله آپارديغى بايراق اوزه رينده يازديرميشدى: "تورك فتحعلى شاه عالمى آيدينلادان جمشيد'دير٫ ايران اؤلكه سينين حاكيمى٫ عالمى ايشيقلانديران گونشدير. ايران آسلانلارين يوواسى٫ ايران شاهى ايسه گونشدير. بونا گؤره ده آسلان – گونش دارا'نين بايراغى اوزه رينه نقش ائديليبدير." (3)

آزربايجانلى قيرال ناصرالدين شاه قاجار٫ آسلان- گونشى ايران دؤولتينين رسمى آمبلئمى ائله ميشدير. ملك الشعرا صبورى ناصرالدين شاه حاققيندا بئله دئميشدير: " اگر ابدى دؤولتين سمبولو آسلان ايسه٫ داليندا هامينين گؤردويو بير گونش واردير. او تورك اوغلو كى بو آمبلئمى باشليغينا تاخيبدير٫ اوزو گونش اولان بير آسلاندير." (4)

ايران مشروطيت بايراغينى ميللييتجه تورك اولان مشيرالدوله تبريزى طرراحليق ائتميشدير. اونون بايراغيندا قيرميزى مشروطييت حركتينى٫ آغ باريش سئوه رلييى٫ ياشيل ١٢ ايماملى شيعه لييى و ايسلامى٫ آسلان قورخمازليغى٫ گونش گوجو٫ شوعاعلارى آيديليغى و قيلينج اؤلكه نى مودافيعه نى تمثيل ائده ر.

فارس پهلوى ديكتاتورلوغوندا گونشين آدام شكلينده رسم ائديلمه سى ياساقلانيب و بايراغا پهلوى تاجى علاوه ائديليبدير.

فارس ايسلام جومهورييتى اورتاداكى فيگورلارى گؤتوره رك يئرينه آللاه عيباره سينى و شريدلر آراسيندا الله اكبر يازيلارينى يئرله شديريبدير.

1- "بنه آن سر به پيش شمس تبريز
كه ايمان است سجده آن صنم را" مولانا

2- "شكل مسجد كه در روزنامه خود علامت ايران گذاشته اى٫ در نظر من نامناسب است....بر تو لازم است كه .... علامتى پيدا كنى.... كه پادشاهان صفويه را به ياد آورد٫ چون شكل تاج دوازده ترك از سقرلات (پارچه سرخ).... " آخوندزاده. در باب شعار روزنامه ملت سنيه ايران (روزنامه ملتى) كه علامت مسجد شاه تهران را دارد. قريتيكا٫ ١٨ رمضان٫ ١٢٨٣ ه.ق.

3- "فتحعليشاه ترك٫ جمشيد گيتى افروز
كشورگشاى ايران٫ خورشيد عالم آرا٫
ايران كنام شيران٫ خورشيد شاه ايران
زانست شير و خورشيد٫ نقش درفش دارا...."

4- "گر شير نشان دولت جاويد است
خورشيد به پشت اوست٫ هر كس ديده است
آن ترك پسر٫ كه اين نشان هشته به سر
شيرى باشد كه روى او خورشيد است. " ملك الشعراء صبورى

Read more- Ardı- بقيه- آردي

آزربايجان`ين مركزينده، تبريز قادينلاري آدينا تحميلى فارس ديلينده كونگره
-------------------------------------------------------------------------------
ت.د.پ.

-------------------------------------------------------------------------------
دورنا سايتيندا تبريزلي قادينلار آديندا بير خبر يئرله شديريلميشديرּ

http://www.durna.info/qadin_tebriz.htm

فارسجا قلمه آلينان بو يازى٬ تبريزده گئچيريله ن قادين قورولتايى حاققينداديرּ يازيدا دؤولتين ياراتديغي "بير سيرا محدودييتلر"، تورك ديلينين ايشله ديلمه سينه قويولان ياساقدان و مراسيمين ده فارس ديلينده٬ اؤزو ده آزربايجان آدينين حذف ائديلمه سيندن٬ موفقيت و مطلوب شكلينده آد آپاريليبديرּ

بو يازى حقيقتن دئموكراتيك و چاغداش دوشونجه٬ مدنى ذئهنييته يادليق و اوزاقليق٬ حتتا غفلت و بلاهت گؤسته رگه سيديرּ

اؤزلريني تبريزلي قادينلار آدلانديران بو قوروهدان سوروشورام:

١- دؤوولتين قويودوغو بو "بير سيرا محدودييتلر" نه لردير؟

٢- نييه بو محدودييتلر و سيخيشديرمالار حاققيندا بو موددت ايچينده خالقا خطابن هله ده آيرينتيلي بير راپور يازماييبسينيز؟ نه اوچون خالقيميز و آيدينلارينى٬ دؤولتين آنتى دئموكراتيك٬ آنتى تورك و آنتى آزربايجان ماهييتى و اويقولاديغى سيياستلرى حاققيندا بيلگيله نديرميرسينيز؟

٣- محدودييت و زورلامالارى ايجاد ائده ن مقاملارين٬ ايداره لرين٬ اورقانلارين آدينى نييه اؤز راپورونوزدا يازمادينيز؟ نييه بونلارى سايتلاردا٬ نشرييه لرده٬ اينسان حاقلاري درنه ك و قادين قورولوشلاريندا ايفشا ائتمه دينيز؟

٤- قويولان و اينديكى آناياسايا دا ضيد و ترس اولان بو محدودييتلر اوچون٬ نييه محدودييت قويان مقاملار علئيهينه شيكايت ائتمه دينيز٬ نييه اونلارى محكمه يه چكمه دينيز؟

٥- نييه دؤولتين بو راسيست زورباليغينا بويون اه يدينيز؟ سيز نييه بونلارا ائعتيراض ائله مه دينيز؟

٦- سيزه كيم حاق وئريب آزربايجاندا گئچيريله ن بير اوتورومون آديندان آزربايجان آديني حذف ائلييه سينيز؟

٧- سيز هانسى حاقلا آزربايجان`ين مركزينده٬ اؤزو ده تبريز قادينلاري آدينا تحميلى فارس ديلينده كونگره گئچيريرسينيز؟

٨- نه واختدان مدنى و غئير-ي دؤولتى بير تشكيلاتين٬ فاشيست٬ راسيست٬ دينچى و آنتى آزربايجان بير دؤولتين ياساق و زورلامالارينا بويون اه يمه سى٬ ميسيب تسليم اولماسى٬ باشاري حتتا مدنى بير حركت آدلانديريلير؟

٩- نه واختدان آزربايجان`ين مركزينده تورك ديلينه قويولموش ياساقلا٬ آزربايجان آدينين گؤتورولدويو اوتانج وئريجى و شرم آور بير كونگره گئچيرمك٬ باشاري ساييلير؟

١٠- سيزه كيم حاق وئريب دؤولتين زورلاما ديل سيياستينه باش اه يمكله٬ ايراندا تورك و آزربايجان قادين حركتيني غئير-ي دئموكراتيك٬ اينسان و قادين حاقلاريندان آنلامايان٬ ميللى ديل بيلينجيندن محروم و اونا لاقئيد قالان بير حركت كيمي تقديم ائده سينيز؟

Read more- Ardı- بقيه- آردي

بو نه بيچيم آذربايجان دئموكرات فيرقه سي`دير؟
-------------------------------------------------------------------------------
ت.د.پ.

-------------------------------------------------------------------------------
آذربايجان دئموكرات فيرقه سينين سايتينداكي خبرلر بؤلومونده تكجه فارسجا يازيلان خبرلر٬ اؤزو ده فارس قزئتلردن، سايتلاردان و ايران دؤولتينين رسمي آژانسلاريندان آلينان خبرلره يئر وئريليرּ

http://www.adf-mk.org/X/xeber.html

بورادا ايراندا ياشايان تورك خالقي و گونئي آذربايجان`ين مساله لري ايله علاقه لي٬ اؤزه لليكله ميللي دئموكراتيك موجاديله ايله ايلگيلي توتوقلامالار٬ باسقيلار٬ قزئتلرين باغلاديلماسي، يارغيلامار و باشقا اينسان حاقلارينين گؤبودجا پوزولماسيندان هئچ بير خبر تاپابيلمه زسينيزּ

حتتا دؤولتين اورمو گؤلو آدالارينين توركجه آدلاريني فارسجالاشديرماسي كيمي راسيست بير اولايلا ايلگيلي ده آذربايجان دئموكرات فيرقه سي سايتيندا بير خبر بولونماز.

بو نه بيچيم آذربايجانچيليق٬ بو نه بيچيم دئموكراتليق٬ بو نه بيچيم آذربايجان دئموكرات فيرقه سي`دير؟

Azərbaycan Demokrat Firqəsinin saytındakı xəbərlər bölümündə, təkcə Farsca yazılan xeberler, özü də Fars qəzət, saytlardan və İran dövlətinin rəsmi ajanslarından alınan xəbərlərə yer verilib.

http://www.adf-mk.org/X/xeber.html

Burada İranda yaşayanTürk xalqı ve Güney Azerbaycanın məsələləri ilə əlaqəli, özəlliklə milli demokratik mücadilə ilə ilgili tutuqlamalar, təzyiqlər, qəzetlerin bağladılması və başqa insan haqlarının gobudca pozulmasından heç bir xəbər tapabilməzsiniz.

Hətta dövlətin Urmu gölü adalarının Türkcə adlarını Farscalaşdırması kimi rasist bir olayla ilgili də Azərbaycan Demokrat Firqəsi saytında bir xəbər bulunmaz.

Bu nə biçim Azərbaycançılıq, nu nə biçim demokratlıq, bu nə biçim Azərbaycan Demokrat Firqəsidir?

Read more- Ardı- بقيه- آردي